Самарқанд вилояти ҳокими Эркинжон Турдимов иштирокида тадбиркорлар билан ўтказилган мулоқот чоғида тадбиркорлар ўзларини қийнаётган муаммолар, банклар ва хизмат кўрсатувчи тармоқлар томонидан содир этилаётган оворагарчиликлар ҳақида очиқ-ошкора фикр билдирди. Бу ҳақда «Халқ сўзи» хабар бермоқда.
Мулоқотда тегишли соҳа вакиллари тадбиркорларнинг саволларига жавоб қайтарди. Жавоблар залдагиларни қониқтирмаган ҳолларда мулоқот кесатиқ ва мутойибаларга ҳам уланиб кетди.
— Тўрт йилдан бери новвойлик билан шуғулланаман, — дейди Пастдарғом тумангаз бошлиғи Искандар Худойқулов фаолиятидан норози бўлган тадбиркор Ихтиёр Эргашев. — Аввалига «газ идораси билан шартноманг йўқ» деб жаримага тортишди. Қонун талаби бўйича рисоладагидек ҳужжат тайёрлаб иш бошлагач, бозорда тенг бўлмаган рақобатга дуч келдим. Тумангаз ва бошқалар билан келишиб ишлаётган «тадбиркор новвой»лар нонни савдо растасига икки мингдан чиқарса, мен икки минг икки юз сўмдан чиқаряпман. Чунки, менда солиқ юки бор. Уларда эса бу мажбурият йўқ.
Йиғилишдан сўнг вилоят ҳокимлиги кўмагида ташкил этилган гуруҳ билан тадбиркор фаолиятига тўсиқ бўлаётган муаммоларни ўрганиш мақсадида Пастдарғом туманида бўлинганида бир қатор шахслар ноқонуний фаолият юритаётгани маълум бўлди.
Жумладан, «Пастдарғомтумангаз» ходимларидан бири Шерхон Нарқулов Охунжон Шодиев исмли шахсга ўз ҳовлисидан тадбиркорлик билан шуғулланишга жой ажратгани ҳолда, новвойхона газ тармоғига ноқонуний улангани билан қизиқмаган. Тегишли ҳужжатларсиз жами 5 кишининг ноқонуний тадбиркорлик фаолияти билан шуғулланишига йўл очиб берган. Бу ҳолатга солиқ ва тумангаз ходимлари ҳам томошабин бўлиб келган.
Ноқонуний новвойхона ташкил этилган ҳовлида гуруҳ томонидан ўтказилган кузатув куниёқ ҳовли эгаси Мейли Нарқулов дарҳол тадбиркор сифатида давлат рўйхатдан ўтказиб қўйилди.
Хуллас, Пастдарғомда тадбиркор фаолиятига ғов бўлаётган муаммолар борлиги, улар тузатилиш ўрнига тегишли мутасадди ташкилотлар томонидан хаспўшланиб, яширилиб келинаётгани маълум бўлди
Изоҳ (0)