Ўзбекистон ва Франция ўртасидаги таълим йўналишидаги ҳамкорлик сифат жиҳатидан янги босқичга кўтарилмоқда. Хусусан, туризм ва иқтисодиёт соҳалари бўйича Бухоро ва француз мамлакати олий таълим муассасалари фаолиятини ривожлантириш, айни йўналишларда малакали мутахассислар тайёрлаш борасида кенг кўламли ишлар олиб борилмоқда, деб маълум қилади Бухоро вилоят ҳокимлиги.
Бунда вилоят ҳокими Ў.Барноев бошчилигидаги делегациянинг жорий йил апрель ойида Францияга қилган ташрифи чоғида олий таълимда истиқболли лойиҳаларни амалга оширишга доир келишувларга эришилгани муҳим аҳамият касб этди. Мулоқотлар натижасида Бухорода Vatel меҳмонхона ва туризм бизнеси институтини очиш бўйича битим имзоланганди.
Шунга кўра, Бухоро давлат университетида Vatel меҳмонхона ва туризм бизнеси институти ўз ишини бошлади. Маълумот учун, 2019—2020 ўқув йилидан кўплаб йигит-қиз институтнинг қалдирғоч талабаси бўлиш бахтига эришади. «Марко Поло» ўқув дастури асосида таълим бериладиган мазкур институтда талабалар 2-босқич даврида Vatel’нинг 59 та шунга ўхшаш мактабларидан бирида бир йиллик таҳсил олиш имконига эга бўлади.