Ўзбекистоннинг Берлиндаги элчиси Набижон Қосимов 9 июль куни Германия Федерал канцлери Ангела Меркель таклифига биноан расмий қабулда иштирок этди. Ўзбекистон ТИВ матбуот хизмати хабарига кўра, учрашув Германияда аккредитациядан ўтган дипломатик миссиялар ва халқаро ташкилотларнинг раҳбарлари учун Мезеберг ҳукумат қароргоҳида ўтказилган.
Қабулда канцлер Ангела Меркель билан қисқа суҳбат бўлиб ўтиб, у ярим йил ичида амалга оширилган иккита олий даражадаги ташриф — Президент Шавкат Мирзиёевнинг январь ойидаги Германияга ва Президент Франк-Вальтер Штайнмайернинг май ойидаги Ўзбекистонга ташрифлари якунларидан мамнунлигини билдирган. Канцлер ташриф якунларини ўта муваффақиятли ва сермаҳсул деб баҳолаган.
Германия ҳукумати раҳбарининг фикрича, олий даражадаги мазкур ташрифлар, шубҳасиз, икки давлат ўртасида турли соҳалардаги ишончли муносабатлар ва ўзаро манфаатли ҳамкорликнинг фаоллашувига хизмат қилади.
Учрашувда Ангела Меркель Шавкат Мирзиёевга ўзининг эҳтироми ва энг эзгу тилакларини ҳам етказиб қўйишни сўраган.
Изоҳ (0)