Куни кеча ижтимоий тармоқларда овози Андижон вилояти ҳокими Шуҳрат Абдураҳмоновники деб тахмин қилинаётган шахснинг нутқи ёзилган аудио тарқалган эди. Унда овоз эгаси тиббиёт тизими амалдорларини танқид қилаётгани, танқид давомида уларни ҳақоратлаётганини эшитиш мумкин.
Ушбу ҳолат юзасидан Ўзбекистон Соғлиқни сақлаш вазирлиги баёнот берди. Вазирлик баёноти билан қуйида тўлиқ танишиш мумкин.
Маълум бўлишича, Андижон вилоят ҳокимлигида 2019 йил 3 январда ўтказилган йиғилиш баёни қарори билан вилоят молия бошқармасига пул маблағларини тиббиёт муассасаларидан йиғиб олиб, вилоят соғлиқни сақлаш бошқармаси ҳисоб рақамига марказлаштириш ҳамда ушбу пул маблағларига тўғридан-тўғри тузилган шартномаларга мувофиқ, шприц, инфузион система ва тиббий қўлқоплар сотиб олиш топширилган.Ваҳоланки, «Давлат харидлари тўғрисида»ги қонунга кўра, тўғридан-тўғри шартнома тузиш йўли билан ушбу тиббий буюмларни харид қилиш тақиқланган. Юқоридаги топшириқ асосида Андижон шаҳрида жойлашган Makro Фарм Андижон компанияси билан юқоридаги қонун талабларига зид равишда тузилган тўғридан-тўғри шартномалар асосида жами 6,3 миллиард сўмлик мувофиқлик сертификати мавжуд бўлмаган шприц ва системалар сотиб олинган. Худди шундай тартибда топшириқ асосида Андижон шаҳридаги Голд Гроwн Pharmа компаниясидан ноқонуний равишда жами 20,1 миллиард сўмлик мувофиқлик сертификати мавжуд бўлмаган тиббий қўлқоп маҳсулотлари харид қилинган.
«Аслида ушбу маблағларга вилоят аҳолисига тиббий хизмат кўрсатиш учун дори воситалари ва бошқа зарур тиббий бумлар ҳам сотиб олиниши лозим эди. Бунинг оқибатида, Андижон вилоятида 2018—2019 йилларда шприц, система ва қўлқоплар билан таъминот даражаси зарур эҳтиёждан бир неча маротаба ортиққа таъминланган, лекин шошилинч ёрдам учун керакли бўлган ва бошқа дори воситалари эҳтиёжга нисбатан бир неча маротаба кам харид қилинган», — дейди Соғлиқни сақлаш вазирлигининг Юридик бўлими бошлиғи Руслан Муҳаммадиев.
Оддий қилиб айтганда, пул маблағларининг нотўғри тақсимланиши ва давлат харидларини амалга ошириш тартиби бузилиши оқибатида ўрганилган ташкилотларда вилоят аҳолисининг дори воситаларига бўлган эҳтиёжи 44,5 фоизга («Актовегин» дори воситасига бўлган эҳтиёж ҳатто 5 фоизга) таъминланган бир пайтда, қўлқоп 265 фоизга, система 103 фоизга ҳамда шприц 500 фоизга эҳтиёждан ортиқ сотиб олинган.
«Амалдаги қонун ҳужжатлари талабларига мувофиқ, юқоридаги кўрсатилган тиббий буюмлар мажбурий равишда сертификатлаштирилиши, яъни сифати Ўзбекистонда амалда бўлган стандартларга тўлиқ жавоб бериши шарт эди. Табиийки, бундай сертификати бўлмаган маҳсулотларни сотиш ва ишлатиш умуман мумкин эмас. Лекин, шунга қарамай, кўрсатилган ҳолатда бундай сертификати бўлмаган (ҳаттоки 47 та ҳолатда бундай сертификат бериш рад этилган) сифатсиз тиббий буюмлар сотиб олинган», — дейди Руслан Муҳаммадиев.
Ушбу ҳолатлар вазирлик томонидан аниқланганидан кейин дастлаб 2019 йилнинг 13 май куни Андижон вилоят ҳокими номига бу тўғрида расмий хат юборилиб, юзага келган муаммоли масаланинг ечимида амалий ёрдам кўрсатиш сўралган. Вазият бўйича ҳеч қандай ижобий ўзгариш сезилмаганидан кейингина ҳамда вилоят тиббиёт муассасаларида дори воситаларига эҳтиёж кучайиб, дори воситалари таъминоти билан боғлиқ вазият чигаллашишни бошлаганидан кейин (орадан 15 кун ўтиб) 28 май куни Ўзбекистон Бош прокуратурасига юқоридаги ҳолат бўйича тўпланган материаллар юборилган ва масаланинг оқилона ечимини топишда амалий ёрдам кўрсатиш сўралган.
«Таъкидлаш керакки, Ўзбекистон Бош прокуратурасига юборилган хатда Андижон вилояти ҳокимлиги ёки ҳоким Шуҳрат Абдураҳмонов ҳақида ҳеч қандай маълумот мавжуд эмас», — дейилади Соғлиқни сақлаш вазирлиги баёнотида.
Изоҳ (0)