Навоий вилояти Хатирчи тумани «Галабек» маҳалла фуқаролар йиғини аҳолиси ҳамда Навоий вилояти ИИБ бошлиғи ва ҳокимят мутасаддилари, вилоят корхона-ташкилот раҳбарлари иштирокида сайёр қабул ташкиллаштирилди. Бу ҳақда Навоий вилоят ИИБ матбуот хизмати хабар берди.
Унда аҳолининг турмуш тарзи ва яшаш шароитини яхшилаш, ҳудудда яшовчи ижтимоий ҳимояга муҳтож, кам таминланган оилалар, ногирон шахсларнинг муаммоларини ўрганиш ҳамда уюшмаган ёшларни аниқлаб, уларни иш билан таъминлаш каби масалалар кўриб чиқилди.
Жумладан, «Ш.Рашидов» маҳалласида яшовчи фуқаро Абдусалим Исроилов Хатирчи туманида мавжуд «Кўксарой» сув омбори қошида манзарали ҳамда мевали дарахтлар ўтқазиб дам олиш масканига айлантириш таклифи билан чиқди. Сектор раҳбари ҳамда туман ҳокими томонидан мазкур таклиф-мурожаат юзасидан фуқаро Абдусалим Исроиловга тушунтиришлар берилиб, таклифи бўйича вилоят туризм бошқармаси ходимларга учрашиши айтилган.
Худди шундай сайёр қабул вилоятнинг Нурота туманида ҳам бўлиб ўтди. Аҳоли томонидан билдирилган фикр-мулоҳазалар обдон тингланиб, деярли барчаси ижобий ҳал этилишига эришилган.
«Истиқлол» МФЙда истиқомат қилиб келаётган Нурмурод Мададов имкониятлари чекланганлиги сабабли ногиронлик аравачаси сўраган. Унинг мурожаати сайёр қабул жараёнинг ўзида ҳал этилган. Маҳаллада масжид қуриш таклифини ўртага ташлаган «Сойкечар» МФЙда яшовчи Муродилло Қаршиевнинг бу таклифи қаноатлантирилиб, масжид қуриши учун мос ер майдони танлаб олинган.
Изоҳ (0)