Шу кунларда ижтимоий тармоқларда Тошкентда жазо муддатини ўтаётган Гулнора Каримованинг ўзбек халқига мурожаати қизғин муҳокама қилинмоқда. Мурожаатда Гулнора Каримова халқдан узр сўраган ва Ўзбекистонга 1,2 миллиард долларни қайтарганини(!) маълум қилган.
«Бу менинг сўнгги олти йилдаги илк мурожаатим. Менинг бугунги аҳволимга ачинаётган ва мен учун дуо қилаётган барчага ташаккур билдираман. Мен халқдан ва мен дуч келган муаммони ҳурмат қилган ва ҳурмат қилаётган барчадан узр сўрайман», дейилади маҳкуманинг қизи Имон Каримова Instagram саҳифасида эълон қилган мазкур мурожаатда.
Шундан сўнг ўзбек шоу-бизнеси вакиллари янги челленжни бошлаб юбордилар — қўшиқчилар Instagram’даги ўз аккаунтларида Гулнора Каримованинг расмларини жойлаб, пост қолдира бошлади.
«Санъатимиз юлдузлари» Гулнора билан аввал тушган фотоларини жойлаб, «Сизни соғиндик, тезроқ эсон-омон оилангиз бағрига қайтинг. Сиҳат-саломатлик тилаймиз», «Оллоҳим қўлласин. Фарзандларингизга бош бўлинг, тану жонингиз соғ бўлсин. Сизнинг дуогўйларингиз кўп. Сиз менинг кумиримсиз», «Эсон-омон оилангиз бағрига қайтинг» деб ёзишди.
Бундай қувонганлар орасида таниқли журналистлар ва блогерлар борлиги янада ажабланарли. «Гулноранинг кучи, билими, ташкилотчилик қобилияти, қолаверса, пулидан ўзбек халқи манфаати йўлида фойдаланиш шарт. Унга озодлик бериш, ҳеч бўлмаса, Фонд форум доирасида фаолият юритишига имкон бериш керак. Бир ойгина олдин кечирилиши ақлимизга сиғмаган одамлар кечирилиб, уларга уй-жой ҳам берилганда, наҳотки, Гулнорани кечирмаслик керак?», деб астойдил куйинганлар ҳам бўлди.
Қизиғи, Гулнора Каримованинг мурожаати ҳақида расмий манбаларда бирор маълумот берилмади. Бу бўйича Олий Судга яқин вақт ичида бирор мурожаат келиб тушмагани, унинг ва оила аъзоларининг турли манбалар орқали тарқатаётган баёнотлари Гулнора Каримованинг шахсий ташаббуслари экани, бу борада расмий ҳужжатлар кўриб чиқилмаётгани тўғрисида мутасаддилар хабар берди.
Хўш, унда бу мурожаат, унда баён этилган 1,2 миллиард доллар ҳақидаги гаплардан кимга нима наф? Қолаверса, аллақачон Гулнора Каримовани соғиниб қолган, тезроқ қайтишини истаётганлар ҳар бир жиноят учун жазо муқаррарлиги, у шоҳ бўладими, гадоми қонун олдида тенглигини билишмайдими? Агар отасининг мавқеи ёки ҳурмати юзасидан бу хонимнинг жинояти муқаррар даражада катта бўлишига қарамай кечираверсак, биз интилаётган эркин фуқаролик жамияти қуриш ҳақидаги мақсад-муддаоларимиздан не маъно қолади? Суриядан келган аёлларни кечирдик бу хонимни ҳам кечиришимиз керак, деган иддаолар ҳам, назаримизда, жуда ортиқча.
Ахир, бу аёллар, бегуноҳ болаларни муҳтарам Президентимиз олов ичидан олиб келди. Қолаверса, Юртбошимизнинг шахсан ўзи уларнинг нима учун юртни ташлаб чиқиб кетишганини ўйлаб кўриш керак, деган ўринли саволни ўртага ташлади, инсондек яшашлари учун бир имкон ҳадя этди. Эҳтимол, Каримова хонимнинг нафси ҳакалак отмаганида, халқ мулкига чанг солмаганида, виждонсизларча ўғирлик қилмаганида нафақат ушбу 156 нафар инсон, балки дунёнинг турли бурчагига тариқдек сочилиб кетган 2 миллиондан зиёд ўзбек бугун оиласи бағрида тўкис яшармиди? Эҳтимол, ана шу пулларга юртимиз тиббиёти ривожланиб, оққонга чалинган болалар, саратон туфайли ҳаётдан кўз юмган ёш-ёш инсонларнинг дардига даво топилиб, улар бугун орамизда юришармиди?! Балки миллиард-миллиард доллар миқдоридаги маблағлар таълим тизимига сарфланганида ушбу сармоя мамлакат ҳаётида аллақачон самара бера бошлармиди? Хуллас саволлар кўп, аммо шуниси аниқки, Каримова хонимнинг ҳолати билан 156 нафар юртдошимиз орасида осмон билан ерча тавофут борлигини эсдан чиқармаслик лозим.
Пост қолдирганлар орасида «Каримовнинг ҳурмати учун» деган гаплар ҳам учрамоқда. Бу ҳам нотўғри фикр. Зеро, Каримовнинг ўзи тириклигидаёқ қизининг қинғирликларини фош қилиш, унинг қонун олдида жавоб беришига йўл қўйиб берди. Нафақат отасининг, балки бутун халқининг номусини ерга урган инсоннинг эса виждон азоби асло осон ўтиб кетмайди, агар виждони бор бўлса, Гулнора энди эл олдида бош кўтариб юролмайди. Қолаверса, осонгина кечириб, бу кимсага раҳм-шафқат қилсак, биз, ўзимиз халкнинг орини, ғурурини ер билан битта қилган бўлмаймизми? Бизни кузатиб турган дунё ҳамжамияти орасида кулгига қолмаймизми?
Холбуки, шу вақтга қадар Гулнора ва унинг фарзандлари ўзбек халқининг ўғирлаб, чет элларга олиб чиқиб кетган маблағини қайтаришга турли хийла-найранглар билан қаршилик қилиб келмоқда.
Бир сўз билан айтганда, «Ҳеч иккиланмай халқ пулини ўғирлаш ва бир муддат қамоқда ўтириб чиқиб, ҳаётни келган еридан давом эттиравериш мумкин экан», деган фикр бошқаларда шаклланмаслиги, аксинча, ўғрилик ва хиёнатнинг борар манзили надомат эканини, ўзбекларда ор-номус мустаҳкамлигини кўрсатиб қўйиш бугун ҳар биримиздан ҳам қарз, ҳам фарздир.
Интернет материаллари асосида тайёрланди
Изоҳ (0)