25 июнь Бандлик ва меҳнат муносабатлари вазири Шерзод Кудбиев Вазирлик томонидан ташкиллаштирилган стажировка дастури иштирокчилари билан учрашув ўтказди. Бу ҳақда Бандлик ва меҳнат муносабатлари вазирлиги «Дарё»га хабар берди.
Учрашув давомида вазир стажёрларни саралаш босқичидан муваффақиятли ўтганликлари билан табриклади. Зеро, танловда битта ўринга 34 номзод тўғри келди.
«Вазирлик томонидан ўтказилаётган мазкур стажировка дастури – бу ёшларнинг соҳа бўйича юксалишлари учун ажойиб имкониятдир. Бироқ юқори натижаларга эришиш учун жон куйдиришга ва ўзига, ўз кучига ишонишга тўғри келади», – дея таъкидлади Шерзод Кудбиев.
Очиқ саралаш босқичига ариза топширган 826 нафар номзоддан 24 нафари ушбу босқичдан ўтишга муваффақ бўлди.
Улар орасида Ўзбекистон билан бир қаторда хорижий ОТМ битирувчилари ҳам бор.
Жаҳон иқтисодиёти ва дипломатия университети – 9
Тошкент давлат иқтисодиёт университети – 2
Тошкент давлат юридик университети – 2
Тошкент ирригация ва қишлоқ хўжалигини механизациялаш муҳандислари институти – 1
Тошкент давлат шарқшунослик инстути – 1
Ўзбекистон давлат жаҳон тиллари университети – 1
Тошкент давлат техника университети – 1
Тошкент шаҳридаги Халқаро Вестминстер университети – 1
И.М.Губкин номидаги Россия давлат нефть ва газ университетининг Тошкент шаҳридаги филиали – 2
Ломoносов номидаги Москва давлат университети – 1
Тошкент шаҳридаги Сингапур менежментни ривожлантириш институти – 1
Катовис шаҳридаги Силезс университети – 1
Вяц давлат университети – 1
Стажировка дастури иштирокчилари қуйидаги йўналишлар бўйича миллий лойиҳалар билан ишламоқда:
- меҳнат миграциясини такомиллаштириш, бунда иштирокчилар мигрантларни олдиндан касбга ва тилга кўниктириш марказлари, Роструд билан интеграциялашув ва имтиёзли чипталар тизимини яратиш ишларига жалб этилган;
- БМТ Тараққиёт дастурининг «Ўзбекистонда ёшлар бандлигига кўмаклашиш» лойиҳасини ташкиллаштириш ва лойиҳа менежменти;
- Ўзбекистоннинг «WorldSkillsUzbekistan» Ассоциациясига аъзо бўлишига оид ишлар;
- резюме ва бўш иш ўринлари республика базасини шакллантириш мақсадида Аҳоли бандлигига кўмаклашиш марказларининг давлат хизматларини қайта кўриб чиқиш;
- Давлат меҳнат инспекцияси бизнес жараёнларини фаоллаштириш.
Учрашув давомида дастур иштирокчилари йўналишлар бўйича ўзлари ишлаётган лойиҳалар тақдимотини ўтказиб, вазирлик раҳбарияти ва мутасадди вакиллардан тегишли тавсиялар олишди.
Стажировка дастури иқтидорли ёшларни аниқлаш, уларни давлат хизматларига жалб этиш, профессионал фаолиятга тайёрлаш, шунингдек, соҳа бўйича келгусида юксалишлари учун кўмаклашишга қаратилган. Таъкидлаш жоизки, ёш мутахассислар учун мўлжалланган мазкур дастурда ҳақ тўланиб, дастур уч ой давом этади. Стажировка якуни бўйича айрим иштирокчилар Вазирлик марказий аппарати ва тасарруфий ташкилотларга ишга таклиф қилинади.
Изоҳ (0)