25-iyun Bandlik va mehnat munosabatlari vaziri Sherzod Kudbiyev Vazirlik tomonidan tashkillashtirilgan stajirovka dasturi ishtirokchilari bilan uchrashuv o‘tkazdi. Bu haqda Bandlik va mehnat munosabatlari vazirligi “Daryo”ga xabar berdi.
Uchrashuv davomida vazir stajyorlarni saralash bosqichidan muvaffaqiyatli o‘tganliklari bilan tabrikladi. Zero, tanlovda bitta o‘ringa 34 nomzod to‘g‘ri keldi.
“Vazirlik tomonidan o‘tkazilayotgan mazkur stajirovka dasturi – bu yoshlarning soha bo‘yicha yuksalishlari uchun ajoyib imkoniyatdir. Biroq yuqori natijalarga erishish uchun jon kuydirishga va o‘ziga, o‘z kuchiga ishonishga to‘g‘ri keladi”, – deya ta’kidladi Sherzod Kudbiyev.
Ochiq saralash bosqichiga ariza topshirgan 826 nafar nomzoddan 24 nafari ushbu bosqichdan o‘tishga muvaffaq bo‘ldi.
Ular orasida O‘zbekiston bilan bir qatorda xorijiy OTM bitiruvchilari ham bor.
Jahon iqtisodiyoti va diplomatiya universiteti – 9
Toshkent davlat iqtisodiyot universiteti – 2
Toshkent davlat yuridik universiteti – 2
Toshkent irrigatsiya va qishloq xo‘jaligini mexanizatsiyalash muhandislari instituti – 1
Toshkent davlat sharqshunoslik instuti – 1
O‘zbekiston davlat jahon tillari universiteti – 1
Toshkent davlat texnika universiteti – 1
Toshkent shahridagi Xalqaro Vestminster universiteti – 1
I.M.Gubkin nomidagi Rossiya davlat neft va gaz universitetining Toshkent shahridagi filiali – 2
Lomonosov nomidagi Moskva davlat universiteti – 1
Toshkent shahridagi Singapur menejmentni rivojlantirish instituti – 1
Katovis shahridagi Silezs universiteti – 1
Vyats davlat universiteti – 1
Stajirovka dasturi ishtirokchilari quyidagi yo‘nalishlar bo‘yicha milliy loyihalar bilan ishlamoqda:
- mehnat migratsiyasini takomillashtirish, bunda ishtirokchilar migrantlarni oldindan kasbga va tilga ko‘niktirish markazlari, Rostrud bilan integratsiyalashuv va imtiyozli chiptalar tizimini yaratish ishlariga jalb etilgan;
- BMT Taraqqiyot dasturining “O‘zbekistonda yoshlar bandligiga ko‘maklashish” loyihasini tashkillashtirish va loyiha menejmenti;
- O‘zbekistonning “WorldSkillsUzbekistan” Assotsiatsiyasiga a’zo bo‘lishiga oid ishlar;
- rezyume va bo‘sh ish o‘rinlari respublika bazasini shakllantirish maqsadida Aholi bandligiga ko‘maklashish markazlarining davlat xizmatlarini qayta ko‘rib chiqish;
- Davlat mehnat inspeksiyasi biznes jarayonlarini faollashtirish.
Uchrashuv davomida dastur ishtirokchilari yo‘nalishlar bo‘yicha o‘zlari ishlayotgan loyihalar taqdimotini o‘tkazib, vazirlik rahbariyati va mutasaddi vakillardan tegishli tavsiyalar olishdi.
Stajirovka dasturi iqtidorli yoshlarni aniqlash, ularni davlat xizmatlariga jalb etish, professional faoliyatga tayyorlash, shuningdek, soha bo‘yicha kelgusida yuksalishlari uchun ko‘maklashishga qaratilgan. Ta’kidlash joizki, yosh mutaxassislar uchun mo‘ljallangan mazkur dasturda haq to‘lanib, dastur uch oy davom etadi. Stajirovka yakuni bo‘yicha ayrim ishtirokchilar Vazirlik markaziy apparati va tasarrufiy tashkilotlarga ishga taklif qilinadi.
Izoh (0)