Uzbekistan Airways чипталари нархи ҳақида маълумот берилди

Тошкентдаги Миллий матбуот марказида Uzbekistan Airways ўтказган матбуот анжуманида маълум қилинишича, 2018 йилда авиакомпания 3 миллион 173 минг йўловчига хизмат кўрсатган. Бу ҳақда ЎзА хабар бермоқда.

Ўтган йилдан бугунги кунга қадар 4 та янги – Мумбай (ҳафтасига 3 қатнов), Владивосток (ҳафтасига 1 қатнов), Жидда (ҳафтасига 3 қатнов) ва Жакарта (ҳафтасига 2 қатнов) йўналишлари очилган.

Ўзбекистон Республикасининг бир қатор ҳуқуқий-норматив ҳужжатлари ижросини таъминлаш мақсадида авиакомпания томонидан 2018 йилда чегирмалар тақдим этилган. Жумладан, вақтинча меҳнат фаолиятини амалга ошириш учун Россия Федерациясига сафарга чиққан шахсларга иқтисодий класс минимал тарифидан 20 фоиз миқдорида, Қорақалпоғистон Республикаси ва Хоразм вилояти аҳолисига 50 фоиз миқдорида. Шунингдек, чет эллик сайёҳлар учун халқаро қатновларда тарифлар 30 фоизгача пасайтирилган.

Uzbekistan Airways вакилларининг сўзларига кўра, ўтган йилда мамлакатда авиаёқилғининг нархи ошганига қарамасдан ўртача тариф халқаро йўналишлар бўйича 13 фоизга, маҳаллий йўналишларда эса 50 фоизгача пасайтирилди.