«Ўзбектелеком» уйда интернет тезлигини ошириш бўйича тавсиялар берди
«Ўзбектелеком» тарифда эълон қилинган интернет тезлиги нима сабабдан баъзан 100 Мбит/с ни ташкил этмаслиги бўйича изоҳ берди, шунингдек, интернет тезлигини ошириш усулларини маълум қилди.
«Барчамиз офис ёки хонадонга қайд этилган симли Интернетни симсиз Wi-Fi тармоғи орқали «тарқатилиши»га ўрганганмиз. Аммо, Wi-Fi роутеримиз қандай Wi-Fi стандартларига жавоб беришига жуда кам эътибор қаратамиз. Авваллари буни билишнинг ҳожати ҳам йўқ эди, чунки провайдердан тариф режасидаги уланиш тезлиги ҳар доим 100 Мбит/с дан паст бўлган.
Мисол учун, бугунги кунда абонентлар «UNLIM 100» тариф режасига уланаётганда, Wi-Fi тармоғининг ҳақиқий узатиш тезлиги баъзида 100 Мбит/с дан паст эканлиги маълум бўлади. Сабаби нимада? Муаммо нимада: провайдердами ёки уй қурилмасидами?
Аввало, биринчи навбатда, уйингиздаги Wi-Fi роутерингизнинг техник имкониятларини ўрганиш зарур. «Wi-Fi» атамаси билан боғлиқ кўплаб стандартлар мавжуд бўлиб, уларнинг барчаси частота ва максимал маълумотларни узатиш тезлиги жиҳатидан ўз хусусиятларига эга. Эҳтимол, айнан сизнинг қурилмангиз 100 Мбит/с тезликда ишлайдиган техник имкониятга эга бўлмаслиги ёки роутер нотўғри ўрнатилган бўлиши ҳамда охирги фойдаланувчигача бўлган тезликка таъсир этадиган радио тўлқинлар учун тўсиқлар мавжуд бўлиши ҳам мумкин. Бунинг бир нечта сабаблари мавжуд», — дейилади компания хабарида.
«Тезликни қандай ошириш мумкин?» — деган саволга жавобан қуйидагича тавсиялар берилган:
Симсиз алоқа уланиш тезлиги жуда кўп турли омилларга боғлиқ бўлади. Имкон қадар, роутер ва абонент қурилмалари бир хонада жойлашиши ва улар орасида ҳеч қандай тўсиқ (деворлар, тўсувчи буюмлар ва бошқалар) мавжуд бўлмагани маъқул. Wi-Fi роутерининг техник кўрсаткичлари ва унинг созламаларига кўп нарса боғлиқ бўлади. Масалан, бугунги кунда роутерларнинг энг кенг тарқалган моделлари 2.4 ГГц (802.11n) стандартини қўллаб-қувватлайди, янги моделлар эса 5 ГГц (802.11аc) стандартига жавоб беради. Ишлаб чиқарувчи томонидан маълум қилинган тезлик ва мазкур стандартлар 100 Мбит/с дан анча юқори, бироқ аслида, ҳақиқий тезлик жуда паст бўлиши мумкин.
5 ГГц (802.11аc) стандартига жавоб берувчи Wi-Fi роутерларни харид қилишни тавсия қиламиз. Бундай ҳолда тезлик 5 ГГцли частотада симсиз тармоққа нисбатан амал қилиш даври анча камроқ бўлса-да, тезлик юқори бўлади. Агар сиз икки диапазонли роутердан фойдалансангиз, провайдерга тўловни амалга оширадиган 100 Мбит/с. тезликда уланишнинг тўлиқ салоҳиятини очиш мумкин. Шунингдек, гигабит портлари (тезлиги WАN ва LAN - 1 Гбит/с.)га эга роутерни ҳам кўриб чиқишингиз мумкин.
