Мишель Платини қўйиб юборилди

УЕФА собиқ президенти Мишель Платини ҳеч қандай айбловларсиз ҳибсдан озод этилди. Бу ҳақда AP хабар берди.

63 ёшли француз Қатарга футбол бўйича Жаҳон Чемпионати—2022 мезбонлигини бериш доирасидаги терговлар доирасида қўлга олинганди.

Платинининг сўзларига кўра, унга Евро—2016, Жаҳон Чемпионати—2018 ва Жаҳон Чемпионати—2022 мусобақалари доирасида бир қанча саволлар берилган. Бундан ташқари терговчилар уни 2011 йилда қатарлик ишбилармонлар томонидан сотиб олинган ПСЖ клуби борасида ҳам сўроққа тутган.

Францияликнинг адвокати Уильям Бурдонга кўра, бу «шовқиндан бошқа ҳеч нарса» эмас. Адвокатнинг қайд этишича, бу иш улар учун ёпилган.

Платини билан биргаликда Франция собиқ президенти Николя Саркозининг маслаҳатчиси Софи Дион ҳам қўлга олинганди. Собиқ президент администрацияси бош котиби Клод Геан ҳам сўроқ қилинган, аммо тезда қўйиб юборилган.

Платини Жаҳон Чемпионатига мезбонлик қилувчи мамлакатни аниқлашдан бир неча кун аввал Швейцарияда Қатар футбол федерацияси вакиллари билан учрашган.

Платини бу ишларни Франция собиқ президенти Николя Саркозининг илтимосига кўра қилгани таъкидлади.

Полицияни, шунингдек, 2010 йил 23 ноябрда Елисей саройида ташкил этилган зиёфат қизиқтирган. Ушбу тадбирда Николя Саркози, Мишель Платини, Қатарнинг амалдаги амири Тамим бин Ҳамад ат-Тани, шунингдек, собиқ бош вазир ва ташқи ишлар вазири Ҳамад бин Жасим иштирок этганди. Платини билан бирга қўлга олинган Дион ҳамда Геан ҳам мазкур тадбирда иштирок этган.

Платини 2010 йил 2 декабрь куни бўлиб ўтган 2022 йилги Жаҳон Чемпионати мезбонлиги учун ўтказилган сайловда Қатарга овоз берганлигини тан олди. Француз мазкур ҳолат бўйича 2017 йилнинг декабрида гувоҳлик берганди.