Ўзбек раққосаси ва балетмейстери Қундуз Миркаримова вафот этди. Бу ҳақда «Ўзбекконцерт» хабар берди.
У 1925 йил Тошкентда туғилган. Тамарахоним номидаги балет мактабида таълим олган (1937-1941), Катта театр (Москва) қошидаги хореография билим юртини тугатган (1951).
Янгийўл мусиқали драма ва комедия театрида (1943-1946), Муқумий театрида (1946-1949), Навоий театрида (1951-1953), Ўзбекистон давлат филармониясида (1953-1956) яккахон раққоса, «Баҳор» ансамблида яккахон раққоса ва педагог-репетитор (1957-1967), бадиий раҳбар (1979-1988), Тошкент давлат миллий рақс ва хореография олий мактабида педагог (1964-1979 ва 1988 йилдан; 1996 йилдан профессор) сифатида фаолият юритди.
Унинг ижросидаги рақслар самимий, нафис ва жозибадорлиги, ҳаракатлари шўх ва жўшқинлиги билан ажралиб туради. Қундуз Миркаримова «Ғайратли қиз», «Катта ўйин», «Хоразмча рақс», «Уйғурча рақс», «Роҳат», «Жонон», «Най навоси», «Баҳор тонги», «Тановор», «Занг ўйин», «Помирча рақс», «Дилдор», «Гулруҳ», «Гулноз» каби мумтоз, халқ, замонавий ва бошқа халқлар рақсларини маҳорат билан ижро этган. Шунингдек, у мақом куйларига тушган рақслари билан ҳам машҳур эди. Қундуз Миркаримова рақс сирларини Мукаррама Турғунбоева, Розия Каримова, Гавҳар Раҳимова каби буюк раққосалардан ўрганган.
Санъат дарғаси узоқ ва бахтли, тарихий ва ижодий ҳодисаларга бой ҳаёт кечирди. Умри давомида у хореографиянинг беқиёс примаси, балетмейстер, афсонавий ўзбек рақсларининг ижрочиси ва саҳналаштирувчиси сифатида дунёга танилди. Хитой, Франция, Австрия, Польша, Англия, Шотландия, Бразилия каби дунёнинг ўттиздан ортиқ мамлакатларида бўлиб, ўзбек рақсларини намойиш этди.
Қундуз Миркаримова Ўзбекистон халқ артисти, Собиқ иттифоқ халқ артисти, Мукаррам Турғунбова номидаги мукофотлар совриндори саналади.
1997 йилда эса «Дўстлик» ордени билан тақдирланган.
Изоҳ (0)