АҚШ Малайзиянинг MH17 авиалиниясига тегишли фуқаролик самолётининг уриб туширилиши бўйича ишларга ҳамон Россияни жавобгарликка тортишга уринмоқда. Бу ҳақда АҚШ давлат котиби Майкл Помпео Нидерландияга ташрифи давомида маълум қилди.
«Бизда ушбу масалани ташқи ишлар вазири билан муҳокама қилиш имкони пайдо бўлди, шунингдек, нохуш ҳодисага жавобгар сифатида Россияни жалб этиш учун қўлимиздан келган барча нарсани қиладиган бўлдик. Нидерландияликлар АҚШ келажакда уларни қўллаб-қувватлашига ишонишлари мумкин», — дейди Помпео.
Эслатиб ўтамиз, 2014 йилнинг 17 июлида Амстердамдан Куала-Лумпурга парвоз қилган Малайзияга қарашли самолёт Украина шарқида ҳалокатга учраганди. Ҳаво кемаси бортида бўлган 298 кишининг барчаси вафот этган. Йўловчиларнинг аксарияти нидерландиялик бўлган.
Бирлашган текширув гуруҳи 2018 йил 24 майда эълон қилган янги ҳисоботда лайнер Россия ҳаво ҳужумига қарши мудофаасининг 53-зенит ракета бригадасига тегишли «Бук» томонидан уриб туширилгани айтилган.
Изоҳ (0)