Тошкент—Хўжанд—Чимкент савдо коридори ташкил этилади
Осиё тарққиёт банки Қозоғистон, Ўзбекистон ва Тожикистон ўртасидаги иқтисодий салоҳиятни баҳолаб, 800 миллион доллар миқдорида техник ёрдам кўрсатишга тайёрлигини билдирди, деб хабар беради Sputnik.
Мазкур коридор Чимкент, Тошкент ва Хўжанд каби йирик шаҳарлар орасидан ўтади. У Марказий Осиё давлатлари минтақавий иқтисодий ҳамкорлик дастурининг бир қисмига айланади.
Ушбу шаҳарлар тасодифан танланган эмас. Чимкент ўтган йили Нур-Султон (Остона) ва Олмаота каби республикага бўйсунувч шаҳарга айланган ва қўшимча дотация олиш эҳтимоли мавжуд. Тошкент — Ўзбекистон пойтахти ва мамлакатнинг энг йирик транспорт маркази. Хўжанд — Ўзбекистон чегарасига қулай жойлашган Тожикистоннинг асосий савдо шаҳри.
ОТБ вакиллари учала шаҳар ва унинг атрофидаги туманларда ҳам аҳоли сони кўплигини, шунингдек, бу каби коридорни келажакда ривожлантириш учун тайёр база мавжудлигини таъкидламоқда. Банк маълумотларига кўра, кўрсатиб ўтилган вилоятларда бутун Марказий Осиёнинг 15 фоиз аҳолиси истиқомат қилади. Шунингдек, улар стратегик жиҳатдан халқаро бозорларга боғланган.
«Қозоғистон ва Ўзбекистон, Ўзбекистон ва Тожикистон ўртасидаги муносабатлар яхши томонга ўзгарди. Сўнгги икки йил ичида ушбу давлатлар ўртасида иқтисодий ҳамкорлик етарли даражада жадал ривожланди. Хусусан, Тошкент ва Душанбе ўртасида аввал узилиб қолган алоқалар қайта тикланди», — дейди МДҲ мамлакатлари инситути иқтисодиёт бўлими бошлиғи Аза Мигранян.
Экспертнинг сўзларига кўра, лойиҳа муваффақиятли амалга ошгудек бўлса, бу иқтисодиётнинг саноатлашуви ва модернизацияси учун янги имкониятлар тақдим этади. Бу эса савдонинг кенгайиши, ЯИМнинг кўтаришили ҳамда Қозоғистон ва Ўзбекистон учун алоҳида аҳамиятга эга бўлган экспорт ҳажмининг ошишига олиб келади.
Лойиҳа уч йилга мўлжалланган бўлиб, шаҳарга яқин жойлашган ҳудудларда истиқомат қилувчи аҳолининг бандлигини таъминлаш ва бизнеснинг ривожланиш имкониятини ўрганиш мақсадида Марказий Осиё давлатлари минтақавий иқтисодий ҳамкорлигига аъзо мамалатлар талаби билан ишлаб чиқилган.
