Дунёнинг барча шароб ишлаб чиқарувчи давлатларида бўлган Жан-Баптист Анселот Ўзбекистонга келди. Бу ҳақда Туризмни ривожлантириш қўмитаси матбуот хизмати маълум қилди.
Wine Explorers компанияси асосчиси ташрифи давомида мамлакат виночилик тарихи ва истиқболли лойиҳаларини ўрганди. Жан-Баптист Анселот дунёнинг 75 та мамлакатида бўлиб, 431 та шароб ишлаб чиқарувчи завод фаолиятини ўрганган ҳамда 4500 дан ортиқ вино турларини татиб кўрган.
Ўзбекистонга ташрифини Жан-Баптист Анселот компания расмий сайтида қуйидагича изоҳлайди:
— Узумчилик ва виночиликни ривожлантириш агентлиги директори Отабек Мустафоев билан бўлган учрашув жуда ёқимли кечди. Миллий либос — чопонни кийганимдан завқландим. Ўзбек ошхонаси тимсоли — мазали паловдан баҳраманд бўлдим.
Wine Explorers асосчиси оператор ва фотосуратчи ҳамроҳлигида дунё шароблари ҳақида турли медиа (Wine Explorers, Figaro Wine, Bettane+Desseauve, IVR, The Drinks Business) учун кўп сонли мақолалар ёзган. Лойиҳага оид китоблар, ҳужжатли лавҳалар тайёрлайди.
Қайд этиш жоизки, Wine Explorers вино ишлаб чиқарувчи мамлакатларни рўйхатга олувчи ягона оммавий ахборот компанияси ҳисобланади.