Ўзбекистон давлат ҳокимияти ва бошқарув органлари матбуот хизматларининг иш юритиш тартиби, ахборот тарқатиш усул ва механизмлари замон талабларига мутлақо мос эмас. Бу ҳақда Ўзбекистон Ахборот ва оммавий коммуникациялар агентлиги директори ўринбосари Саида Мирзиёева «ОАВ соҳасида миллий қонунчиликни янада такомиллаштиришнинг долзарб масалалари» республика конференциясида қилган чиқишида тўхталиб ўтди, дея хабар бермоқда «Дарё» мухбири Мусулмонбек Иброҳимов.
Саида Мирзиёеванинг таъкидлашича, халқ билан давлат ўртасидаги ўзаро мулоқот қанчалик яхши таъминланса, аҳолининг давлат органларига бўлган ишончи ва ҳурмати шунчалик ортади. «Шу ўринда нима учун матбуот амалда тўртинчи ҳокимият даражасига кўтарила олмаяпти, деган саволга, кўп омиллар қатори вазирлик ва идора раҳбарларининг матбуот котиби ёки ахборот хизматларига нисбатан эътиборсиз муносабатини асосий сабаб қилиб кўрсатиш мумкин», — дейди агентлик директори ўринбосари.
Бу ҳолатларга барҳам бериш мақсадида 2019 йилнинг февралида Президент томонидан «Ахборот соҳаси ва оммавий коммуникацияларни янада ривожлантиришга оид қўшимча чора-тадбирлар тўғрисида»ги фармони қабул қилинди. Агентлик зиммасига, жумладан, давлат ва хўжалик бошқаруви органларининг ахборот хизматлари фаолиятини янада ривожлантириш ва бу борадаги норматив-ҳуқуқий ҳужжатларни такомиллаштириш вазифаси ҳам юклатилди.
Мирзиёева хонимнинг қайд этишича, ўтказилган таҳлиллар ва ўрганишлар ушбу соҳада энг асосий муаммо — бугунги кунда ягона давлат ахборот сиёсати тўғрисидаги концептуал ҳужжатнинг мавжуд эмаслигини кўрсатган. «Ҳозир ушбу ҳужжат тайёрланмоқда», — деди Саида Мирзиёева. Айни вақтда, ягона давлат ахборот сиёсатини амалга оширувчи ахборот хизматларининг фаолияти янада фаоллаштириш ва такомиллаштириш йўлидаги тўсиқлар масаласи долзарб бўлиб қолмоқда.
Саида Мирзиёеванинг таъкидлашича, давлат ҳокимияти ва бошқарув органлари матбуот хизматларининг иш юритиш тартиби, ахборот тарқатиш усул ва механизмлари замон талабларига мутлақо мос эмас. Қорақалпоғистон Вазирлар Кенгаши, вилоятлар ҳокимликларида ахборот хизматлари фаолияти деярли олиб борилмаяпти. Иш ҳажмларининг кўплиги ва қўшимча топшириқлар билан бандлиги сабабли ахборот хизматлари фаолияти қониқарсиз аҳволда.
Бундан ташқари, 10 дан ортиқ республика даражасидаги давлат ташкилотларида ҳамда 200 га яқин туман ва шаҳар ҳокимликларида ҳалигача ахборот хизматлари фаолияти ташкил этилмаган. Давлат ташкилотларида ахборот хизматларига етарлича штат бирликлари ажратилмагани сабабли ишлар ниҳоятда суст, уларнинг мавқеи ҳануз паст.
«Кўпгина давлат органларининг раҳбарлари ушбу муҳим масалага жиддий эътибор қаратмаяпти, ахборот хизматларининг моддий-техник базаси яратилмаган, штатлар малакали мутахассислар билан тўлдирилмаган», — дейди агентлик директори ўринбосари.
Мирзиёева хоним кўплаб давлат органларининг веб-сайтлари ва ижтимоий тармоқлардаги саҳифалари, мобил мессенжерлар орқали тезкор ахборот тарқатиш ишлари оқсаётганига ҳам эътибор қаратди. Ўзбекистонда интернетдан фойдаланувчилар сони 20 миллиондан ортиқ бўлгани ҳолда, давлат органларининг веб-сайтларига кирувчиларнинг умумий сони 400 минг, Facebook’даги саҳифаларига мурожаат қилувчилар 150 минг, Telegram’даги аъзолари 300 минг нафардан ошмайди.
Саида Мирзиёева давлат органлари томонидан ахборот тарқатишдаги оқсаш маълумотларни хорижий манбалардан излашга ёки муаммоли мурожаатларни чет эл оммавий ахборот воситалари орқали чоп эттириб, давлат идоралари эътиборини жалб қилишга олиб келаётганини қўшимча қилди.
Изоҳ (0)