Самарқанддаги Иштихон бозори қайта қурилади

Zarnews Самарқанддаги абгор ҳолга келган «Иштихон деҳқон бозори» ҳақида мақола чоп эди. Маълум бўлишича, бозор йўл ёқасига кўчирилган.

Самарқандликлар бозор кўчирилиб, унинг ўрнида кўп қаватли уйлар қурилиб, тадбиркорларга сотилади, деган фикрда.

«Маҳаллий аҳолининг айтишича, дастлаб бир кунда бозордаги барча тадбиркорлар туман ташқарисидаги шароити ҳаминқадар бозорчага кўчирилган. Аммо шароит ёқмаганми ёки харидор камайиб кетишидан қўрқишганми, савдогарлар бозорчадан қайтиб келиб, туман марказидаги кўчада савдо-сотиқ ишларини бошлаб юборишган», — дейилади хабарда.

Туман ҳокимининг иқтисодий ва тадбиркорлик масалалари бўйича биринчи ўринбосари Шерзод Ибрагимов бу масалага ойдиндик киритди. Унинг айтишича, «Иштихон деҳқон бозори» кўчирилмайди, балки замон талабларига мос равившда қайта қурилади.

«Ҳозирда бозор расталари орасидаги йўлаклар, бозор маъмуриятига тегишли бинолар ҳокимлик ва бозор маъмурияти томонидан ажратилган маблағ ҳисобига таъмирланмоқда. Шунингдек, чиқиндихона, замонавий ҳожатхоналар ҳам қурилмоқда. Бозор ичидаги дўконлар, расталар эса фойдаланувчи тадбиркорлар томонидан ободонлаштирилмоқда. Яқин кунларда барча қулайликларга эга, замонавий, кўркам ‘Иштихон деҳқон бозори’ ўз эгаларига топширилади. ‘Тоза ҳудуд’ компанияси томонидан чиқиндиларнинг ўз вақтида олиб кетилиши доимий назоратга олинади», — деган у.