Қашқадарёда журналистларнинг танқидий чиқишларига муносабат билдирадиган ишчи гуруҳ тузилди
Қашқадарёда ОАВда журналистлар томонидан кўтариб чиқилган муаммоли ҳолатларга ўз вақтида муносабат билдирувчи, журналист, блогер ва мутахассислардан иборат 7 кишилик ишчи гуруҳ тузилди. Ишчи гуруҳ таркиби вилоят ҳокимлигида бўлиб ўтган матбуот хизматлари фаолиятига доир давра суҳбатида маълум қилинди, дея хабар беради «Дарё» мухбири.
Тадбирда сўз олган вилоят ҳокими ўринбосари Долли Аллаев бугунги кунда ижтимоий тармоқлар ва хориж ОАВларида воқеаларни асл моҳиятини тушуниб етмай ёритиш ҳолатлари учраб турганлигини таъкидлаб, ишчи гуруҳ шундай ахборот берувчиларга ҳам ўз вақтида муносабат билдириши зарурлигини билдирди.
Вилоятдаги давлат ташкилотлари матбуот хизмати раҳбарлари ва журналистлар иштирок этган давра суҳбатида матбуот хизматлари фаолияти таҳлил қилинди. Таҳлил давомида очиқланишича, вилоятдаги 72 та давлат ва жамоатчилик ташкилотининг 39 тасида расмий сайти бор. Шундан 31 та сайт охирги 3-4 йилда янгиланиб турган бўлса, 25-26 тасидаги энг янги хабар 2015, 2016 ва 2017- йилларга тўғри келади. Нари борса 5-6 та сайт бугунги кунда «яшаяпти».
Долли Аллаевга кўра, ижтимоий тармоқларда маҳаллий ҳокимият ва давлат ташкилотлари фаолиятига доир нохолис ахборотларнинг кўпайишига асосий сабаб — матбуот хизматлари ўз ишини етарли даражада бажармаётганлигидан.
Тадбирда сўз олган «Қашқадарё» газетаси бош муҳаррири Камолиддин Каримов матбуот хизмати ходимларининг ахборот беришни пайсалга солишини танқид қилди.
— Китоб туманида келган сел ва унинг оқибатлари ҳақида билиш учун Фавқулотда вазиятлар бошқармасининг расмий изоҳини 3 кун кутдик, — дейди Камолиддин Каримов. — Шу 3 кунда берилган жавобни ҳам қайта-қайта сўрайверганимиздан кейингина олишга муваффақ бўлдик. Ваҳоланки, бу орада хорижий ОАВларда асосланмаган, тасдиқланмаган, сел талофатларини бўрттириб кўрсатувчи видеолар ҳам тарқалиб улгурди.
Тадбирда «Дарё» мухбири вилоят прокуратураси матбуот хизмати республика ҳудудида фаолият юритувчи ОАВларда чоп этилаётган танқидий мақолаларга муносабат билдирмаслиги, аммо хориж ОAВсида эълон қилинган ҳар бир танқидий хабар уларнинг эътиборидан четда қолмаётганлигини айтди.
Бироқ тадбирда вилоят прокуратураси матбуот хизмати иштирок этмаётганлиги боис, савол очиқ қолди. «Дарё» мухбири саволига жавоб беришга уринган вилоят ҳокими ўринбосари бу ҳақда вилоят прокурори Ботир Юсуповга маълум қилиши ва ушбу ҳолатга тез орада изоҳ беришларини айтди.
«Ҳуқуқ» газетаси мухбири Норбўта Ғозиев эса вилоят ҳокими ўринбосари Сирожиддин Азизов ушбу нашрда эълон қилинган ичимлик суви ҳақидаги танқидий мақолага муносабат билдиришда сохта маълумотлар тақдим этганини билдирди.
Долли Аллаев эндиликда вилоят ҳокимининг ҳар бир ўринбосари ҳоким тасдиқлаган режага кўра журналистлар билан шахсан учрашиб, матбуот анжумани ўтказиши, юқоридаги каби ҳолатларга ўзи изоҳ беришини ваъда қилди.
