Марҳум қўшиқчи Уитни Хьюстон ўлимидан етти йил ўтиб, концерт дастури билан сафарга отланмоқчи. Бу ҳақда «Газета.ru» хабар қилади.

Фото: Wikipedia

Хабарларга кўра, қўшиқчи Хьюстоннинг меросхўрлари бу таклиф билан чиққан. Қўшиқчининг менежери Пет Хьюстоннинг айтишича, Уитни Хьюстоннинг концерт дастури учун голограмма тайёрланмоқда. Юлдузнинг илгари эълон қилинмаган ашула ва мусиқалари, унга бағишланган қўшиқлар жамланиб, мусиқий альбом чиқарилади.

Голограмма сафари чоғида Уитнининг акаси, Петнинг турмуш ўртоғи Гэри ва бошқалардан иборат ҳақиқий ансамбл аъзолари бирга чиқиш қилади. Пет марҳум қўшиқчининг менежери вазифасини 2000 йилларнинг бошидан бери бажариб келади. У Уитни меросининг ягона бошқарувчисидир.

Уитни Хьюстон етти йил олдин, 48 ёшида тасодифан чўкиши туфайли вафот этган. Унинг муваффақиятли саҳна карьераси анча олдинроқ, гиёҳванд моддаларни истеъмол қилиши оқибатида тугаган эди.