Давлат Солиқ қўмитаси томонидан президентнинг «Ўзбекистон республикасининг солиқ тизимини такомиллаштиришга доир қўшимча чора-тадбирлар тўғрисида»ги қарори лойиҳаси жамоатчилик муҳокамасига тақдим этилди, деб хабар берди Spot.

Фото: Spot

Лойиҳага кўра солиқ тизимида қуйидаги тартибларни ўрнатиш таклиф этилмоқда:

2019 йил 1 майдан:

  • ягона ер солиғи тўловчилари ихтиёрий равишда қўшилган қиймат солиғини тўлашга ўтиш ҳуқуқига эга;
  • ҚҚСни тўлашга ўтувчи юридик шахслар ва якка тартибдаги тадбиркорлар ушбу солиқни тўловчи сифатида давлат солиқ хизмати органида мажбурий рўйхатдан ўтказилиши лозим;
  • ҚҚСни тўлашга ўтиш даврида ушбу солиқ миқдори ҚҚСни тўлашга ўтиш давридан олдинги охирги 12 ой мобайнида сотиб олинган тасдиқланган Товар-моддий захиралар балансига нисбатан ҳисобга олинади.

2019 йил 1 июлдан:

Тадбиркорлик субъектлари ва уларнинг мансабдор шахслари 90 кун ичида 2019 йил 1 июлгача солиқ ставкаси бўйича ҚҚС ёки даромад солиғи бўйича солиқ мажбуриятларини камайтириш фактларини кўрсатган ҳолда ва ўз вақтида тўланмаган солиқлар суммасининг 50%ини тўлаган тақдирда қонун ҳужжатларида назарда тутилган мажбуриятдан озод қилинади.

Шунингдек, 2019 йил 1 декабрга қадар солиқ ҳисоботлари тизимини интеграциялаш ва ҳисобот тизимини автоматлаштириш билан солиқ тўловчилар ва солиқ органлари ўртасида реал вақт режимида бухгалтерия ҳисоби ва маълумотларни алмашишга имкон берувчи бухгалтерия ҳисобининг ягона ахборот тизими ишлаб чиқилиб, амалиётга татбиқ этилади.

2019 йил 1 сентябрдан бошлаб юкларни ташиш билан шуғулланадиган тадбиркорлик субъектлари «Юкларни ташиш мониторинги» ахборот платформасида юкларни расмийлаштиришни амалга оширишлари шарт бўлган тартиб жорий этилади.

2019−2021 йилларда Ўзбекистон солиқ тизимини ислоҳ қилиш стратегиясини амалга ошириш учун «Йўл харитаси» ишлаб чиқилди.

Халқаро валюта жамғармаси ва Жаҳон банки солиқ тизимини ислоҳ қилиш ва солиқ органларининг ахборот-коммуникация инфратузилмасини модернизация қилишда кўмаклашмоқда.

Ҳужжатда уч ой ичида «Чет эл фуқаролари томонидан сотиб олинган товарлар учун Ўзбекистон чегарасини кесиб ўтишда (tax-free тизими) тўланган қўшилган қиймат солиғи суммасини қайтариш тартибини белгилаш тўғрисида» таклифлар тайёрлаш таклиф этилади.

Бу вазифа молия вазирлиги ва давлат солиқ қўмитасига топширилиши мумкин.