Пойтахтдаги Халқлар дўстлиги санъат саройида 12 май — Халқаро ҳамширалар кунига бағишланган тантанали тадбир ўтказилди. Бу ҳақда «Дарё»га Соғлиқни сақлаш вазирлиги матбуот хизмати маълум қилди.
Тадбирда Соғлиқни сақлаш вазири Алишер Шодмонов, Соғлиқни сақлаш ходимлари касаба уюшмаси республика кенгаши раиси Фарҳод Ханапияев сўзга чиқиб, йиғилганларни Халқаро ҳамширалар куни билан самимий қутлади.
— Замонавий тиббиётни ҳамшираларсиз тасаввур этиб бўлмайди. Энг илғор технологияларга асосланган амалиётларни ўтказиш жараёнидан тортиб, операциядан кейинги бемор парвариши, лаборатория-диагностика соҳаси, уйма-уй юриб, оиладаги тиббий маданият даражасининг юқори бўлишида патронаж ҳамшираларнинг ўрни беқиёс, — деди Алишер Шодмонов. – Шу боис давлат раҳбари ташаббуси билан олиб борилаётган тиббий-ижтимоий ислоҳотлар жараёнида ҳамширалик ишини такомиллаштиришга алоҳида эътибор қаратилаяпти. Президентнинг жорий йил 6 май кунги тиббиёт ва фармацевтика таълими ва илм-фани тизимини янада ривожлантиришга оид қарорига кўра, ўрта тиббиёт ходимларини тайёрлашнинг мутлақо янги тизими жорий этилди. Шу ўринда Ўзбекистонда 300 минг нафардан ортиқ касбига садоқатли ҳамширалар тиббиётнинг турли бўғинларида самарали фаолият юритиб келаётганини таъкидламоқчиман. Улар олдида ҳамиша таъзимдамиз.
Қайд этиш жоизки, бугунги кунгача Тошкент тиббиёт академияси ва тиббиёт институтларининг «Олий ҳамширалик иши» бўлимларида анестезиология ва реанимация, хирургия, акушерлик ва менежмент каби қатор йўналишлар бўйича 4,5 минг нафар олий маълумотли бакалавр хамширалар тайёрланди, юзга яқин ҳамширалар магистр даражасига эга. Улар даволаш-профилактика муассасаларида бош, катта ва етакчи ҳамшира ҳамда тиббиёт институти ва коллежларида ўқитувчи сифатида фаолият юритмоқда. Яна бир эътиборли жиҳати, 18 нафар олий маълумотли ҳамшира тиббиёт соҳасида фалсафа доктори (PhD) илмий унвонига эга бўлди.
Тантанали тадбирда Қорақалпоғистон Республикаси, вилоятлар ва Тошкент шаҳридаги тиббиёт муассасаларида ўтган йил давомида самарали фаолияти билан аҳоли саломатлигини сақлашда муносиб ҳисса қўшган бир гуруҳ ҳамширалар ташкилотчилар томонидан диплом ва эсталик совғалари билан тақдирланди.
Изоҳ (0)