Тошкент шаҳар Ички ишлар бош бошқармаси тезкор гуруҳи ўз жонига қасд қилмоқчи бўлган 50 ёшли эркакни қутқариб қолди. Бу ҳақда Тошкент шаҳар ИИББ матбуот хизмати хабар берди.
«Кеча, 11 май куни, соат тахминан 10:30 ларда 102 рақамига бир эркак телефон қилди. У ўз жонига қасд қилмоқчи эканлиги, бунинг учун тўққиз қаватли уйнинг 5-қаватидан сакрашини маълум қилган. Воқеа жойига — Чилонзор тумани 20-даҳасига Ички ишлар тезкор гуруҳи, Фавқулодда вазиятлар бошқармаси ҳамда тез тиббий ёрдам, шаҳар психиатрик клиник шифохона ходимлари ҳамда ўт ўчирувчилар бригадаси етиб келган. Шунингдек воқеа жойига туман ҳокими билан прокурор етиб борган», – дейилади ИИББ хабарида.
Маълум қилинишича, эркак кичкина осма балконнинг тўсинини ошиб ўтиб, қарори қатъий эканлигини айтиб, бақирган. Йиғилганлар оиласи, фарзандлари ҳақида ўйлаб, бу қароридан қайтишга чақирган.
Шундан сўнг, Тошкент шаҳар ИИББ раҳбарининг буйруғига кўра, воқеа жойига ИИББ махсус топшириқли мобил отряди ходимлари йўналтирилди, улар ўз профессионал малакаларини ишга солиб, эркакни қутқариб қолган.
Айни пайтда эркак билан психиатр ишламоқда.
Изоҳ (0)