Ўн миллиондан ортиқ одам АҚШ президенти Дональд Трампга нисбатан импичмент жараёнларини бошлаш бўйича петицияга имзо чекди. АҚШ вакиллик палатасининг икки нафар аъзоси — Рашид Тлаиб ҳамда Ал Грин ушбу ҳужжатни конгрессга тақдим этиш учун либерал ижтимоий ҳаракатлар каолициясига қўшилди. Бу ҳақда The Hill нашрига таяниб, «РИА Новости» хабар берди.
Трампга импичмент эълон қилинишини Need to Impeach, Free Speech For People, CREDO, MoveOn, Democracy for America, Women's March, Courage Campaign каби гуруҳлар ҳам қўллаб-қувватлади. 9 май куни Капитолий яқинида намойишга демократ конгрессменлар қўшилган.
«Мен доим одамларга бир нарсани таъкидлайман — бу сизнинг вакиллик палатангиз, нима қилишимизни сизлар айтасиз», — дейди Тлаиб. Март ойида у вакиллик палатаси Трампга нисбатан импичмент жараёнларини бошлаши тўғрисида резолюция киритган эди.
Аввалроқ, вакиллик палатаси спикери Нэнси Пелоси Трамп ўзига ўзи импичмент бошлаётганини маълум қилиб, уни адолатни тақиқлашда айблаган эди. Унинг фикрича, мамлакат ҳозирда «конституциявий инқироз»ни бошидан ўтказмоқда.
Изоҳ (0)