Тошкентда 100 минг сўмлик купюраларни қалбакилаштириш ва сотиш билан шуғулланган шахслар қўлга олинди, деб хабар берди ИИББ матбуот хизмати.
Маълум бўлишича, 4 май куни тўрт нафар йигит — Тошкент вилоятида яшовчи, муқаддам судланган, 24 ёшли Сардор Ш., Тошкент вилоятида яшовчи 24 ёшли Беҳзод Т., Тошкент вилоятида яшовчи 20 ёшли Иброҳим Х. ва андижонлик 23 ёшли Ҳумоюнбек О. 100 минг сўмлик қалбаки купюраларни ўтказиш мақсадида Чилонзор туманига келган.
Йигитлар 23 ёшли Шоира А.га 7 та шундай купюрани ўтказган. Қиз эса пулларни йўловчи ташиш билан шуғулланувчи Nexia ҳайдовчиси 33 ёшли Ҳамидулло М. билан ҳисоб-китоб қилган. Ҳайдовчи бу пуллар сохта эканини аниқлаб, Тошкент шаҳар ИИББнинг яқин атрофда хизмат ўтаётган ЙПХ инспекторларини хабардор қилган.
Кўрилган чоралар натижасида юқорида кўрсатилган йигитлар келган машина аниқланиб, тўхтатилган. Машина текширилганда, 51 та қалбаки 100 минг сўмлик, миллий валюта чоп этилган А4 шаклидаги 25 варақ қоғоз ҳамда сохта пулларни тайёрлашда фойдаланилган Canon принтери аниқланган.
Суд экспертизаси маълумотларига кўра, иш юзасидан мусодара қилинган барча купюралар сохта эканлиги аниқланган. Қўлга олинганлардан бири Сардор Ш. шериклари билан Тошкентнинг ҳар хил туманларида қалбаки пулларни сотганини тан олган.
Уларга нисбатан Жиноят кодексининг 176-моддаси («Қалбаки пул, аксиз маркаси ёки қимматли қоғозлар ясаш, уларни ўтказиш») бўйича жиноий иш қўзғатилган.
Маълумот учун, 100 минг сўмлик купюра 2019 йилнинг 25 февралидан бошлаб муомалага чиқарилган.
Изоҳ (0)