Россия компаниясининг алюмин симларини Ўзбекистон биржасида сўмга сотиб олиш мумкин бўлди

Ўзбекистон товар хом ашё биржаси (ЎзРТХБ)нинг ички биржа савдоларида Россиянинг «Русал» компанияси маҳсулоти миллий валюта — сўмда сотувга қўйилди. Бу ҳақда биржа матбуот хизмати хабар берди.

Хабарда айтилишича, компания ишлаб чиқарадиган II АКЛП-ПТ-7, 9,5 миллиметр маркали алюмин симини сотиш учун янги биржа контракти очилган. Алюмин етказиб бериш XT Power Cable Technology томонидан амалга оширилмоқда.

Янги биржа контракти лоти 2 тонна бўлиб, бир тонна учун бошланғич нарх 24,5 миллион сўм (бир лот учун — 49 миллион сўм)ни ташкил этади.

Етказиб бериш шартлари — EXW харидорнинг ўзи сотувчи омборидан олиб кетади.

Узлуксиз қуйиш орқали олинган, диаметри 9,5 миллиметр бўлган яримқаттиқ алюмин сими сим ва бошқа электротехник мақсадларда қўллаш учун мўлжалланган.

Маълумот учун, Россиянинг «Русал» компанияси — бирламчи алюмин ва глинозёма ишлаб чиқарувчи дунёдаги энг йирик компаниялардан биридир. Компания заводларида алюмин эритиш қуввати 4,3 миллион тоннани ташкил этади. Компания маҳсулотлари асосан Европа, Россия ва МДҲ давлатлари, Шимолий Америка, Жануби-Шарқий Осиё, Япония ва Корея давлатларига сотилади.