Грециянинг Orange2Fly ҳамда Туркиянинг Pegasus Airlines лоукостер компаниялари Ўзбекистон бозорига киришга қизиқиш билдирмоқда. Бу ҳақда Давлат туризм қўмитаси раисининг биринчи ўринбосари Улуғбек Қосимхўжаевга асосланиб, «Podrobno.uz» хабар берди.
«Orange2Fly ва Pegasus Airlines билан жиддий ишлаяпмиз, ‘Дававианазорат’ ва ‘Ўзбекистон ҳаво йўллари’ биргаликда улар билан музокара ўтказмоқдамиз. Ушбу авиакомпанияларда Ўзбекистон бозорига кириш бўйича режа мавжуд. Шунингдек, Россия лоукостерлари ҳам қизиқишини билдирмоқда. Умумий ҳисобда 14 та хориж авиакомпанияси билан музокаралар ўтказилмоқда, улар орасида нафақат лоукостерлар, балки KLM, Emirates Airlines, Lufthansa, Air France каби гигантлар ҳам бор», — дейди Улуғбек Қосимхўжаев.
Унинг сўзларига кўра, хориж авиаташувчиларининг бу каби қизиқиш билдиришига ҳозирда Ўзбекистон ўзининг туристик брендини фаол ривожлантиришга интилаётгани ва шунга мос равишда сайёҳлар оқимининг ортиши сабаб бўлмоқда.
«Хориж авиакомпаниялари бизнинг бозорни диққат билан кузатиб бормоқда. Нега бу содир бўляпти? Чунки биз Ўзбекистоннинг туристик брендини жаҳон миқёсида тарғиб қилишга жиддий киришганмиз. Масалан, араб мамлакатлари аҳолиси бизнинг юртимизга туристик йўналишда катта қизиқиш билрмоқда. Ушбу мамлакатлар вакиллари авваллари Суриядаги тоғларга борган бўлса, эндиликда қаерга саёҳат қилишга ҳайрон. Тўғри, Озарбайжон ҳам бор, лекин бу кичкина мамлакат. Бизда эса Бойсун, Жиззах, Тошкент вилояти ва Наманганда тоғлар бор. Бизда тўртта йирик тоғ кластери мавжуд», — дейди Давлат туризм қўмитаси раисининг биринчи ўринбосари.
Изоҳ (0)