Пепе Франция чемпионатида 57 йил аввал қайд этилган натижани такрорлади

Футбол бўйича Франция чемпионатининг 34-турида «Лилль» ҳужумчиси Николя Пепе «Ним» дарвозасига гол урди (5:0).

Бу 23 ёшли вингернинг жорий мавсум Лига 1’даги 20-голи бўлди.

Get French Football News’нинг хабар беришича, Пепе 1961/62 йилги мавсумдан буён Франция чемпионатининг юқори дивизионида 20 та гол урган биринчи кот-дъивуарлик футболчи бўлди.

Маълумот учун, 57 йил аввал «Монпелье» собиқ ўйинчиси Секу Туре ушбу натижага эришганди. 2003/04 йилги мавсумда «Ле-Ман», «Генгам» ва «Марсель» клубларида тўп сурган Дидье Дрогба эса 19 та гол урганди.

Бундан ташқари Пепе мазкур чемпионатда «Лилль» таркибида Эден Азардан кейин 20 та гол урган биринчи футболчи бўлди. Бельгиялик 2011/12 йилги мавсумда ушбу кўрсаткични қайд этган.

Эслатиб ўтамиз, Николя Пепе мусобақанинг тўпурарлари баҳсида фақатгина ПСЖ ҳужумчиси Килиан Мбаппедан ортда қолмоқда. Француз ҳисобида 27 та ўйинда урилган 30 та гол мавжуд.