Сергелида янги қурилган уйлардаги аҳоли учун 5 мингдан ортиқ иш ўринлари яратилади

Сергели туманида қисқа фурсатда 100 дан ортиқ кўп қаватли уй-жойлар қурилиб, аҳолига топширилди. Бу ҳақда «Халқ сўзи» хабар берди.

Мазкур мавзеларда Тошкент шаҳрининг барча туманларидан фуқаролар кўчиб келмоқда. Мазкур оилаларга янада қулайлик яратиш ва иш билан таъминлаш мақсадида маҳаллаларда мактаб, мактабгача таълим муассасаси ва соғлиқни сақлаш масканлари ҳамда ишлаб чиқариш корхоналари ишга туширилмоқда.

2019—2020 йилларда Тошкент шаҳрини комплекс ривожлантириш Дастури доирасида Тошкент ҳалқа автомобиль йўлида 20 дан ортиқ янги корхоналар қурилиши ишлари олиб борилмоқда. Жумладан, ушбу корхоналар орасида текстил маҳсулотларини ишлаб чиқаришга мўлжалланган, 1000 нафар ходимни ишга қабул қилиш имкониятига эга бўлган йирик ишлаб чиқарувчи Bek Mega Textile масъулияти чекланган жамияти қурилиш ишлари жадал суръатларда олиб борилмоқда. Бугунги кунда ушбу корхонанинг биринчи қисми ишга туширилиб, 300 га яқин фуқаролар ишга қабул қилинган.

Шунингдек, Оrchid buity МЧЖ тўлиқ ишга туширилиб, бугунги кунда 200 нафардан ортиқ фуқаролар иш билан таъминланди. Ишга қабул қилинган фуқароларнинг аксарияти янги кўчиб келган фуқаролар ҳисобига тўғри келади.

Ҳозирги кунда «Тошкент металлургия заводи» МЧЖ қўшма корхонаси металл маҳсулотларини ишлаб чиқариш лойиҳаси, «Рости Расти Барака» МЧЖ томонидан болалар ўйинчоқларни ишлаб чиқариш лойиҳаси, «Ади Сет Сервис» МЧЖ томонидан иссиқхона, қишлоқ хўжалиги маҳсулотларини қадоқлаш лойиҳаси, «Orient Confistion» МЧЖ томонидан қандолат маҳсулотларини ишлаб чиқариш лойиҳаси, «Vivat Mebel» МЧЖ томонидан мебел маҳсулотларини ишлаб чиқариш лойиҳаси, «Laxisam Pharmа» МЧЖ томонидан дори воситаларини қадоқлаш лойиҳаларининг ишга туширилиши ишлари олиб борилмоқда.

Бундан ташқари ушбу ҳудудда 2019—2020 йилларда 2 та мебел маҳсулотларини ишлаб чиқариш саноатига, 3 та текстил ва тўқимачилик саноатига, 2 та нефть ва кимё саноатига, 3 та озиқ-овқат саноатига ва чарм пойабзал саноатига мўлжалланган лойиҳаларининг ишга туширилиши режалаштирилган. Мазкур корхоналар негизида беш мингдан ортиқ янги иш ўринлари ташкил этилиши кўзда тутилган ва 200 миллион доллардан ортиқ хорижий инвестициялар жалб этиш режалаштирилган.