2018 йилнинг 17 ноябрь куни 24 миллион сўм пул билан Ўзбекистон–Тожикистон чегараси орқали Душанбе шаҳридаги «Карвон» бозорига борган Фаррух Эргашев у ерда аввалдан таниш бўлган «Ғулом» исмли шахс билан учрашиб 27 600 тожик сомонийсига (24 миллион сўмга) гиёҳвандлик воситасини топиб беришини сўраган.
«Ғулом» исмли шахс ўша куннинг ўзида Фаррух Эргашевга 400 грамм гиёҳвандлик воситасини Сурхондарё вилояти Сариосиё туманига етказиб берган. Фаррух Эргашев таниши «Равшан» исмли шахс орқали Самарқанд шаҳридаги «Ғани» исмли шахс билан 400 грамм опий гиёҳвандлик воситасини 5800 долларга сотишга келишиб олган. 2018 йилнинг 19 ноябрь куни 200 грамм опий гиёҳвандлик моддасини 2100 доллар эвазига «Ғани» исмли шахсга қонунга хилоф равишда сотган.
Ўзининг жиноий ҳаракатини давом эттирган Фаррух Эргашев шу куни соат тахминан 17:30 атрофида Самарқанд–Тошкент йўналиши бўйича ҳаракатланиб бораётган вақтда Булунғур тумани ҳудудидаги «Юқори нуқта» ЙПХ масканида қолган 200 грамм бўлган опий гиёҳвандлик воситаларини сотиш учун олиб кетаётганлиги тезкор тадбир давомида аниқланган.
Жиноят ишлари бўйича Булунғур туман суди раиси Фарҳод Худайбердиевнинг «Дарё»га маълум қилишича, Фаррух Эргашев суд мажлисида ўз айбига тўлиқ иқрорлик билдирган. Суд жараёнида маълум бўлишича, у 2009 йилдан буён ишлаб пул топиш мақсадида Россияга бориб келган. 2012 йил 14 декабрь куни Москва шаҳридаги «Люберский» номли бозорда самарқандлик «Шавкат» исмли бола билан уришиб қолиб уни уриб, қаттиқ жароҳат етказган. Натижада Фаррух Эргашев Москва шаҳрида милиция ходимлари томонидан ушланиб, Россия жиноят кодексининг 162-моддаси 2-қисми билан жиноий жавобгарликка тортилган. Россиядаги Ярославский вилоятида жойлашган жазони ижро этиш муассасасида «Ғулом» исмли Тожикистон фуқароси билан танишиб қолган.
Судланувчи Фаррух Эргашев Ўзбекистон Жиноят Кодексининг 246-моддаси 2-қисми (кўп миқдорда контрабанда қилиш), 273-моддаси 5-қисми (Гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан айбли деб топилиб, 13 йил муддатга озодликдан маҳрум этилди.
Изоҳ (0)