Қўқон шаҳридаги махсус енгил саноат касб-ҳунар коллежига бириктирилган 15 нафар бухоролик тарбияланувчилардан 4 нафарининг ҳужжати муддатидан олдин уйига қайтиши учун ёшлар иттифоқи кафиллиги остида махсус комиссияга топширилди. Бу ҳақда ёшлар иттифоқи вилоят Кенгаши ижтимоий-ҳуқуқий масалалар ва жиноятчиликлар профилактикаси бўлими мудири Ислом Шарипов «Дарё»га хабар берди.
Ёшлар иттифоқининг Бухоро вилоят Кенгаши республикада илк бор янги ташаббусга қўл урган. Вилоят хотин-қизлар қўмитаси ҳамда ички ишлар бошқармаси ходимлари ҳамкорлигидаги ишчи-гуруҳ аъзолари Қўқон шаҳридаги махсус енгил саноат касб-ҳунар коллежида бўлган.
Маълумки, ушбу махсус касб-ҳунар коллежи Республикада ягона бўлиб, унда Ўзбекистоннинг турли бурчакларидан келган 200 нафарга яқин қиз тарбияланади. Бунда ота-онаси турли сабабларга кўра, хусусан, хорижда ишлагани туфайли ташлаб кетган, назоратсиз ва қаровсиз қолган, оиладаги қийинчиликлар сабаб мактабга бормай, турли ишларга, хусусан фоҳишаликка қўл урган ёки ўғриликка мажбурланган қизлар сақланади. Тарбияси оғир вояга етмаган қиз болалар ички ишлар органларининг асослантирилган ҳужжатларига мувофиқ, суднинг қарорига асосан, мазкур коллежга жойлаштирилади. Ёпиқ турдаги бу коллежда ўқувчи-қизлар 18 ёшга тўлгунга қадар тарбияланади.
Ишчи-гуруҳ аъзолари мазкур муассасада таҳсил олаётган тарбияси оғир қизлар билан учрашиб, мулоқот олиб борган. Айниқса, таълим муассасасида таҳсил олаётган 15 нафар бухоролик қиз билан учрашув давомида ишчи гуруҳ вакиллари уларнинг ҳар бири билан алоҳида суҳбатлашиб, келгусидаги режа ва орзу-мақсадлари билан қизиққан.
Учрашув давомида А.Басса ҳамда А.Дарки методикаси асосида қизларнинг агрессия кўрсаткичларини ташхислаш мақсадида ўтказилган тест натижаларига кўра, 15 нафар иштирокчидан 6 нафарида бошқаларга адоват кайфияти, 1 нафарида юқори агрессивлик, 11 нафарида пушаймонлик ҳисси борлиги аниқланган.
Ўзини намунали жиҳатдан кўрсатган тўрт нафар қиз ёшлар иттифоқи кафиллиги остида муддатидан олдин уйларига қайтишлари учун махсус комиссияга ҳужжатлари топширилган.
— Болалигимда ота-онам ажралишди. Орадан кўп ўтмай, онам турмушга чиқди. Мен отамнинг қўлида қолдим. 7-синфда ўқиб юрган кезларимда эса отам ҳам уйланди. Бувим дунёдан ўтди. Ўгай онам отам йўғида доим сиқувга олар, калтакларди. Оч қолган кезларим ҳам кўп бўлган. Бора-бора отам ҳам мени эшитмай қўйди. Мени ҳимоя қиладиган ҳеч ким қолмаганди. Оиламдан совий бошладим. Кўчадаги тенгқурларимга қўшилиб қолдим. Шу-шу боши берк кўчага кириб қолдим. Ҳозирга қадар Қўқон шаҳридаги махсус енгил саноат касб-ҳунар коллежидаман. Куни кеча Бухородан делегациянинг ташрифи сабаб мен Иттифоқ кафиллиги остида уйга қайтариладиган бўлдим. Бунинг учун ёшлар ташкилотига ўз миннатдорлигимни билдираман, — дейди ўқувчи қизлардан бири.
Шу куни ёшлар ташкилоти вилоят Кенгаши вакиллари Тошкент вилоятидаги 21-сонли аёллар жазосини ижро этиш муассассида ҳам бўлган.
Изоҳ (0)