Ўзбекистон Республикаси Президенти Шавкат Мирзиёев 23 апрель куни Қозоғистон Республикаси Президенти Қосим-Жўмарт Тўқаев билан телефон орқали мулоқот қилди. Бу ҳақда Президент Матбуот хизмати хабар бермоқда.
Президент Қозоғистон раҳбарини жорий йил 9 июнь куни ўтказилиши режалаштирилган навбатдан ташқари Қозоғистон Республикаси Президенти сайловига номзод этиб илгари сурилгани билан қутлади ҳамда ушбу муҳим сиёсий тадбирнинг ўтказилишида муваффақият тилади.
Давлат раҳбарлари Қозоғистон Президенти Қосим-Жўмарт Тўқаевнинг жорий йил 14—15 апрель кунлари Ўзбекистонга амалга оширган илк давлат ташрифи натижаларини юксак баҳолади.
Саноат, транспорт-коммуникация ва бошқа соҳаларда аниқ лойиҳаларни амалга ошириш юзасидан эришилган келишувлар ва аниқ лойиҳаларни изчил амалга ошириш, шунингдек, таълим, соғлиқни сақлаш, маданият ва туризм йўналишларида фаол ҳамкорликни давом эттириш муҳим экани алоҳида қайд этилди.
Ўзбекистонда Қозоғистон йилининг ишбилармонликка оид тадбирлар ва маданий-гуманитар алмашинувларга бой дастури қардош халқларнинг янада яқин бўлишига хизмат қилиши таъкидланди.
Қозоғистон Президенти табрик ва самимий тилаклар учун давлат раҳбарига миннатдорлик билдирди.
Мулоқот сўнгида Ўзбекистон ва Қозоғистон Президентлари кўп қиррали ва ўзаро манфаатли ҳамкорликни стратегик шериклик, кўп асрлик дўстлик ва яхши қўшничилик ришталарига таянган ҳолда мамлакатлар ва халқлар манфаатлари йўлида янада мустаҳкамлашга қатъий интилишларини таъкидлади.
Изоҳ (0)