Таълим сифатини янада ошириш, илғор ғояларни юзага чиқариш мақсадида Тошкент шаҳри Ўрта Осиёнинг бу соҳада энг катта тадбири ҳисобланган «Чет тилларини ўқитиш ва амалий тилшунослик» бўйича IX халқаро конференцияга мезбонлик қилади. Конференция чет тилларни ўқитиш ва амалий тилшунослик соҳасига қизиқувчи барча ўқитувчи, тарбиячи, тадқиқотчи ва бўлғуси мутахассислар учун тажриба мактаби бўлиб хизмат қилади.
Бу галги конференциянинг асосий мавзуси тил таълими ҳамда амалий тилшуносликда дуч келинадиган долзарб трендлар, шу билан бирга қатор муаммолар ва уларнинг ечимига бағишланади. Конференция олти мамлакатда жойлашган 12 университет ҳамкорлигида ташкил этилаётган бўлиб, унда Австарлия, Янги Зелландия, АҚШ, Европа Иттифоқи, Ўрта Осиё, Япония, Жанубий Корея сингари 40 дан ортиқ давлатдан 350 га яқин делегат қатнашиши кўзда тутилган.
Анжуманнинг расмий тиллари ўзбек, рус ва инглиз бўлиб, конференцияда нутқ мазкур тилларда тақдим қилинади ҳамда тадбирдан сўнг сараланган мақолалар University Press Publications нашрининг махсус сонида, хорижий ҳамкор журналларда, шунингдек, «Хорижий тилларни ўқитиш ва амалий тилшунослик журнали» — Journal of Foreign Language Teaching and Applied Linguistics’да (J-FTAL) чоп этилади.
Ўзбекистонда илк бор бўлиб ўтадиган ушбу конференция нафақат назарий билим ва кўникмалар улашиш, балки маданиятлараро тажриба алмашиш, янги ҳамкорлик имкониятларини очиш учун ҳам амалий восита вазифасини ўтайди.
Анжуман ташкилотчилари:
- Корея халқаро алоқалар университети;
- Губкин номли Россия давлат нефть ва газ университети филиали;
- ERIELL Prof Education
Конференция манзили: Губкин номли Россия давлат нефть ва газ университети филиали.
Конференцияда қатнашиш учун қуйидаги линк орқали рўйхатдан ўтиш мумкин:
Изоҳ (0)