Фарғонада Ёшлар иттифоқи вилоят кенгаши ва вилоят ахборот-кутубхона маркази ҳамкорлигида 2 та библиобус – автобус ичидаги кўчма кутубхона иш бошлади. Мазкур библиобуслар вилоятнинг тоғли ва узоқ ҳудудларида китобхонларга кутубхона ва савдо хизмати кўрсатади. Бу ҳақда «Дарё»га Ёшлар иттифоқи Фарғона вилояти кенгаши матбуот хизмати маълум қилди.
Библиобусларнинг ҳар бирига 1500 донадан бадиий ва илмий-маърифий китоблар жойлаштирилган. Вилоят ахборот-кутубхона марказининг Ferghana bookland QR-кодли электрон китоблар таблоси ўрнатилган. Библиобусда бепул Wi-Fi тармоғи бўлиб, фойдаланувчилар электрон китобларни ўз мобил қурилмаларига бепул юклаб олиши мумкин.
Библиобуслар дастлаб Ёзёвон туманининг «Хонобод» маҳалла фуқаролар йиғинидаги 13-, 14-, 15-мактаблар ва маҳалла гузарлари, шунингдек, Қувасой шаҳридаги «Мирзо Улуғбек» маҳалла фуқаролар йиғини ҳудудида китобхонларга бепул хизмат кўрсатди. 105 нафар ёшлар библиобус – кўчма кутубхонанинг илк аъзолари бўлди. Уларга ўзбек ва жаҳон адабиётининг сара асарлари 15 кун муддатга фойдаланиш учун берилди.
17 апрель куни библиобуслар Данғара, Бешариқ, Ўзбекистон ва Учкўприк туманларидаги маҳалла фуқаролар йиғинлари ҳамда умумий ўрта таълим мактабларида бўлди. 483 нафар ёшлар кўчма кутубхона аъзолигига қабул қилинди. Уларга ўзбек ва жаҳон адабиётининг сара асарларидан 495 таси 15 кун муддатга фойдаланиш учун берилди.
Изоҳ (0)