Қўқонда шаҳар прокурори ташаббуси билан марказдан 12 км узоқликда жойлашган Муқимий шаҳарчасида илк жамоатчилик кутубхонаси очилди. Бу ҳақда «Дарё»га Қўқон шаҳар прокуратураси маълум қилди.
Кутубхона учун 2000 донадан ортиқ китоб харид қилинди. Улар орасида диний-маърифий, бадиий, ижтимоий-сиёсий ва болалар учун мўлжалланган адабиётлар бор. Маҳалла аҳолиси ҳам кутубхона учун ўз шахсий кутубхоналаридан китоблар совға қилмоқда.
Кутубхонадан фойдаланиш бепул. Исталган киши паспорт ва сурат олиб келиб, кутубхонага аъзо бўлиши мумкин.
– Муқимий шаҳарчаси таркибидаги 2 та маҳалла фуқаролар йиғинида 10 минг нафардан зиёд аҳоли яшайди. Мактабимизда 1256 нафар ўқувчи таълим олади. Маҳалла гузарида жамоатчилик кутубхонаси очилгани айни муддао бўлди. Ўқувчиларимиз дарсдан бўш вақтларини мазкур кутубхонада ўтказишяпти, – дейди 30-умумтаълим мактаби директори Одинахон Исмоилова.
Тез орада шаҳардаги яна 14 та маҳалла гузарида шундай мўъжаз кутубхоналар ташкил этиш режалаштирилган.
Изоҳ (0)