Qo‘qonda shahar prokurori tashabbusi bilan markazdan 12 km uzoqlikda joylashgan Muqimiy shaharchasida ilk jamoatchilik kutubxonasi ochildi. Bu haqda “Daryo”ga Qo‘qon shahar prokuraturasi ma’lum qildi.
Kutubxona uchun 2000 donadan ortiq kitob xarid qilindi. Ular orasida diniy-ma’rifiy, badiiy, ijtimoiy-siyosiy va bolalar uchun mo‘ljallangan adabiyotlar bor. Mahalla aholisi ham kutubxona uchun o‘z shaxsiy kutubxonalaridan kitoblar sovg‘a qilmoqda.
Kutubxonadan foydalanish bepul. Istalgan kishi pasport va surat olib kelib, kutubxonaga a’zo bo‘lishi mumkin.
– Muqimiy shaharchasi tarkibidagi 2 ta mahalla fuqarolar yig‘inida 10 ming nafardan ziyod aholi yashaydi. Maktabimizda 1256 nafar o‘quvchi ta’lim oladi. Mahalla guzarida jamoatchilik kutubxonasi ochilgani ayni muddao bo‘ldi. O‘quvchilarimiz darsdan bo‘sh vaqtlarini mazkur kutubxonada o‘tkazishyapti, – deydi 30-umumta’lim maktabi direktori Odinaxon Ismoilova.
Tez orada shahardagi yana 14 ta mahalla guzarida shunday mo‘jaz kutubxonalar tashkil etish rejalashtirilgan.
Izoh (0)