ДХХ Андижон вилоят бошқармаси ходимлари томонидан ўтказилган тезкор тадбир давомида Хўжаобод тумани «Мундуз» МФЙ ҳудудида «Андижон—Қорасув» йўналишида ҳаракатланиб кетаётган Раҳматилло Аҳмедов бошқарувидаги Nexia 3 русумли автомобиль тўхтатилди. Бу ҳақда ЎзА хабар бермоқда.
Мазкур машина кўздан кечирилганда, унинг юкхонасига яшириб қўйилган 1 дона 30 литр ҳажмли елим идишда ва 2 дона целлофан пакетда жойланган жами 2.116.501 (икки миллион бир юз ўн олти минг беш юз бир) АҚШ доллари миқдоридаги хорижий валюта борлиги аниқланди.
Маълум бўлишича, Тошкент шаҳридан бериб юборилган ушбу пулларни Қорасув шаҳрида яшовчи Раҳматилло Аҳмедов Шаҳрихон туманида кутиб олган. Мазкур катта миқдордаги хорижий валюта божхона назоратини четлаб ўтиб, қўшни Қирғизистонга чиқарилиши керак бўлган.
Ҳозирда мазкур ҳолат юзасидан ДХХ Андижон вилоят бошқармаси томонидан жиноят иши қўзғатилиб, ушбу ишга алоқадор шахсларни аниқлаш бўйича зарур чора-тадбирлар кўрилмоқда.
Изоҳ (0)