Грузиянинг TBC Bank банки Ўзбекистонда Payme бренди остида фаолият кўрсатувчи Inspired МЧЖ акцияларининг 51 фоизини сотиб олди. Шартнома қиймати 5,5 миллион долларни ташкил этади. Бу ҳақда банк матбуот хизматига таяниб, «Газета.uz» маълум қилди.
Хабарда қайд этилишича, Payme Ўзбекистонда 1,3 миллион нафар мижозга эга етакчи тўлов хизмати ҳисобланади. Ўтган йилнинг ўзида хизмат мижозлар сони тахминан 70 фоизга ошиб, ялпи тушум ва соф даромад мос равишда 41,9 ва 24,5 фоизга кўтарилган.
2018 йил якунида Payme ялпи активлари 700 минг доллар, йил давомида солиққа солинишдан аввалги умумий тушуми ва фойдаси 1,6 миллион ва 0,8 миллион долларни ташкил этди.
Payme компаниясига 2011 йилда асос солинган ва уч нафар таъсисчи томонидан бошқариб келинаётган эди.
51 фоизлик назорат пакети (5,5 миллион доллар) билан ҳисоблаганда Payme 10,8 миллион долларга баҳоланмоқда. Тўлов апрель охирига қадар TBC Bank маблағлари ҳисобидан тўланади. TBC Bank қолган 49 фоизлик акцияларни сотиб олиш имкониятлари тўғрисида ҳам келишувга эришди.
Payme сотиб олинганидан сўнг TBC Bank ва унинг шўъба компаниялари хизмат кўрсатаётган фойдаланувчилар сони 50 фоиздан кўпроққа ошиб, 3,7 миллион кишига етиши кутилмоқда.
Изоҳ (0)