Ички ишлар вазири ўринбосари аҳоли билан мулоқот қилиш, мавжуд долзарб муаммоларни аниқлаш ва уларни жойида бартараф этиш мақсадида 9–11 апрель кунлари Фарғона вилоятида сайёр қабул ўтказмоқда. Бу ҳақда «Дарё» мухбири хабар бермоқда.
Фарғона вилояти Халқ қабулхонасида 9 апрель куни ўтказилган сайёр қабулда 85 нафар фуқаронинг ички ишлар идораларига ишга кириш ва хизматга қайта тиклаш, хорижга чиқиш-келиш, фуқароликни расмийлаштириш, йўл ҳаракати хавфсизлигини таъминлаш, мол-мулк ва бошқа буюмларни олиб қўйиш ёки қайтармаслик, ички ишлар идоралари ходимларининг ноўрин хатти-ҳаракатларидан норозилик масалаларига оид мурожаатлари тингланди.
Қабул жараёнида муаммоларнинг 25 таси жойида ижобий ҳал этилди. Қўшимча ўрганиш талаб этиладиган 22 мурожаатнинг кўриб чиқилиши назоратга олинди, 9 таси қонуний асосларга кўра рад этилди, 29 таси бўйича асослантирилган ҳуқуқий тушунтириш берилди.
Жумладан, уй-жой ажратилишини сўраб мурожаат қилган 1965 йилда туғилган фуқаро С.Бурҳоновага Фарғона шаҳар Қ.Муртазоев кўчасида жойлашган 16-уйнинг 15-хонадони яшаш учун ажратиб берилди. Бундан ташқари, 5 нафар фуқаро ногиронлик аравачаси, 3 нафар фуқаро эшитиш ускунаси билан таъминланди.
Бугун, 10 апрель куни вазир ўринбосари Риштон тумани ҳокимлигида фуқароларни қабул қилмоқда. Вазир ўринбосарининг аҳоли билан мулоқоти 11 апрель куни Қўқон шаҳрида бўлиб ўтади.
Изоҳ (0)