Фарғона «Темурбеклар мактаби»га Амир Темур бюсти ўрнатилди

Кеча, 9 апрель куни Фарғона вилоятида жойлашган «Темурбеклар мактаби»да буюк Амир Темур таваллудининг 683 йиллиги ҳамда Соҳибқирон бюстининг очилишига бағишланган тантанали тадбир бўлиб ўтди. Бу ҳақда Мудофаа вазирлиги матбуот хизмати «Дарё»га хабар берди.

Унда Фарғона вилояти ҳокими Шуҳрат Ғаниев, Шарқий ҳарбий округи қўшинлари қўмондони полковник Лутфулло Бузруков, фахрийлар, вилоят фаоллари ҳамда ўқувчи ёшлар иштирок этган.

Амир Темур бюсти буюк давлат асосчиси Соҳибқирон номи, бой мероси ва хотирасини улуғлаш, унинг улуғ саркарда сифатидаги ҳарбий салоҳиятини намоён этиш билан бирга, ҳарбий хизматчилар, айниқса, ёшлар қалбида ватанпарварлик, буюк аждодларга ҳурмат, ғурур ва ифтихор туйғуларини юксалтиришга хизмат қилади.

Тадбир қатнашчилари буюк Соҳибқирон бюсти пойига гулчамбарлар қўйган. Маросим давомида Фарғона вилояти ҳокими Шуҳрат Ғаниев сўзга чиқиб, Амир Темур давлатчилиги, унинг одил сиёсати ҳақида фикр билдирган.

Тадбир якунида Фарғона вилояти ҳокими ҳарбий хизматчиларга «Темур тузуклар» китобини улашган.

Шу куни Қашқадарё вилоятининг Муборак туманида жойлашган Тоифаланган объектларни қўриқлаш қўшинлари қўмондонлигига қарашли ҳарбий қисмларнинг бирида ҳам «Амир Темур – адолат ва қудрат тимсоли» ғояси остида бюст мажмуаси очилишига бағишланган маросим бўлиб ўтган.

Ушбу тадбирда Қашқадарё вилоят Амир Темур жамоаси фонди раҳбари – Қарши давлат унверситети профессори Очил Бўриев, Қашқадарё вилоят Ўзбекистон ёзувчилар уюшмаси аъзоси Баходир Абдураззоқов, Муборак туман «Муборакнефтгаз» МЧЖ раҳбари Қаҳрамон Қурбонов, туман ҳокимлиги ва бошқалар иштирок этган.

Тадбир сўнгида мазкур мажмуани қурилиш ишлари ва ташкил қилишда амалий ёрдамлари учун ҳомий ташкилотларга ҳарбий қисм қўмондонлигининг эсдалик совғалари топширилган.