Яқинда Малайзия пойтахти Куала-Лумпур шаҳрида «MIHAS-2019» 16—Халқаро ҳалол маҳсулотлар кўргазмаси бўлиб ўтди. Бу ҳақда «Халқ сўзи» хабар беради.
Мезбон давлат халқаро савдо ва саноат вазирлиги ҳамда Ташқи савдони ривожлантириш корпорацияси (МATRАDЕ) томонидан 2004 йилдан буён ҳар йили ташкил этилади. Мазкур тадбир ўз йўналишида Жануби-Шарқий Осиёдаги энг йирик форум ҳисобланади.
Бу галги кўргазмада озиқ-овқат маҳсулотлари, ичимликлар, ҳалол косметика, ислом модаси, тўқимачилик ва дори воситалари, туризм, молия, логистика ва электрон тижорат жабҳасидаги хизматлар тақдим қилинди. Унда 800 дан зиёд машҳур компаниялар ўз маҳсулотлари билан қатнашган бўлса, буларни кўриш учун дунёнинг 80 давлатидан 23 мингдан ортиқ киши ташриф буюрди.
Ташқи ишлар вазирлиги маълумотига кўра, ушбу нуфузли анжуманда республиканинг Малайзиядаги элчихонаси ҳам ўз миллий стенди билан иштирок этди. Мамлакат озиқ-овқат саноати вакиллари, хусусан, «Elite Food Group» ва «For Tea» компаниялари маҳсулотлари кўпчиликка манзур бўлди. Малайзия, Сингапур, Индонезия ва Хитой бизнес доираларида Ўзбекистон маҳсулотларининг юқори таъм сифатига эга эканлигини алоҳида эътироф этишгани бунинг тасдиғидир.
Жумладан, Ўзбекистонда илғор ва инновацион технологиялар асосида ишлаб чиқарилган бир марталик кетчуп, майонез, асал ва соуслар дунёдаги етакчи авиакомпаниялар, меҳмонхона ва тез овқатланиш ресторанлари эътиборини ўзига тортди. Қолаверса, кўргазмада ҳозир бўлган жаҳонга машҳур қаҳвахоналар тармоғи мутасаддилари келгусида Жануби-Шарқий Осиё мамлакатлари ҳудудларида сотиш учун Ўзбекистонда тайёрланган турли печеньеларни харид қилишга қизиқиш билдирди.
«MIHAS-2019» якунида Ўзбекистон вакиллари Малайзия компаниялари билан ўзаро ҳамкорлик бўйича дастлабки шартномаларни имзолади. Жумладан, «Elite Food Group» МЧЖ Малайзиянинг Air Asia авиакомпанияси билан ҳамда Малайзия, Сингапур ва Индонезиядаги тез овқатланиш ресторанларига маҳсулотларни етказиб бериш бўйича Batavia Indo Global PT билан ҳам келишувга эришди. Шунингдек, Old Town компанияси қаҳвахоналари, Малайзия бозорларига сулили ва шоколадли печеньелар сотиш, 2019 йил II-III чоракларида Ўзбекистонга малайзиялик 400-500 нафар сайёҳларни юборишга оид битимлар қабул қилинди.
Изоҳ (0)