Фармацевтика тармоғини ривожлантириш агентлиги директори ўринбосари Алишер Темиров бошчилигидаги делегацияси Франциянинг Страсбург шаҳрида бўлиб ўтган Соғлиқни сақлаш учун дори воситаларининг сифати бўйича Европа кенгаши директорати Европа фармакопеяси 163-сессиясида иштирок этди. Бу ҳақда Соғлиқни сақлаш вазирлиги матбуот хизмати хабар берди.
Унда Соғлиқни сақлаш учун дори воситаларининг сифати бўйича Европа кенгаши директорати директори Сузанна Кайтел ҳамда «Дори воситалари, тиббий буюмлари ва тиббий техника экспертизаси ва стандартизацияси Давлат маркази» ДУК директори Шерзод Абдуғаниев ўртасида «Ўзбекистон Республикаси давлат фармацевтика институтини яратиш учун Европа фармакопеясининг матнларидан нусха кўчириш ва мослаштириш ҳуқуқини бериш тўғрисида»ги келишув имзоланган.
«Бугун юртимизда 150 дан ортиқ маҳаллий дори воситалари ва тиббий буюмлар ишлаб чиқарувчи корхоналар мавжуд бўлиб, улар томонидан 2500 номдаги дори воситалари давлат рўйхатидан ўтказилган. Ҳозиргача дори-дармонларнинг сифат назорати бир қатор хориж мамлакатларнинг халқаро эътироф этилган фармакопеялари талабларига мувофиқ амалга оширилар эди. Эндиликда мазкур келишувга мувофиқ, ягона, халқаро талаблар билан мувофиқлаштирилган Ўзбекистон Давлат фармакопеяси чоп этилади», — дейди Шерзод Абдуғаниев.
Натижада дори воситалари, реактивлар, дори шакллари сифат назоратининг уйғунлашган замонавий халқаро стандарт талаблари даражасида амалга ошириш, уларнинг хавфсизлигини таъминлаш ҳамда маҳаллий дори воситаларини хорижий давлатларда рўйхатдан ўтказиш жараёнини қисқа муддатларда амалга ошириш имконияти пайдо бўлади.
Изоҳ (0)