Самарқандда бугун, 29 март куни соат 3:00 атрофида бошланган ёмғир ёғиши оқибатида шаҳарнинг бир қатор кўчаларида тошқин юзага келди. Сув тошқинларини бартараф этиш мақсадида Самарқанд шаҳар ҳокимлиги ва ободонлаштириш бошқармаси томонидан зарур чоралар кўрилмоқда. Хусусан, кўчалардаги сувни бартараф этиш мақсадида 300 нафарга яқин ободонлаштириш ходимлари жалб этилган. Улар ариқлар ва сув тўпланиб қолган жойларда тозалаш ишларини олиб бормоқда.
«Дарё» мухбири Фарҳод Норбўтаевнинг хабар беришича, тошқинни бартараф этиш учун шаҳар ҳокимлиги томонидан 30 дан ортиқ техника, 6 та водовоз, 4 та трактор, 7 та самосвал ва 1 та кран жалб этилган.
— Ёмғир натижасида сув тўпланиб қолган Самарқанд шаҳридаги Шоҳизинда, Registon, Ибн Сино, Рудакий, Гулобод, Садриддин Айний, Мир Саид Барака кўчалардаги ариқлар тўлиқ мунтазам равишда тозаланиб борилмоқда, — дейди Самарқанд шаҳар ҳокимлиги ободонлаштириш бошқармаси бошлиғи Бобур Алиев. — Ходимларимиз эрталаб соат 4:30 дан бошлаб кўчалардаги тошқинни бартараф этишга киришган.
Самарқанд шаҳар ҳокимлиги ушбу ноқулайлик учун шаҳар аҳолиси ва меҳмонлардан узр сўраган. Ҳозирда ҳокимият ҳузурида тезкор штаб ташкил этилган. Айни пайтда шаҳарнинг Буюк ипак йўли, Даҳбет ва Registon кўчалари чорраҳасида соҳавий хизматлар ходимлари томонидан сув йўлларини очиш ишлари олиб борилмоқда. Шунингдек, шаҳарнинг бошқа кўчаларида ҳам сув тошқинларининг олдини олиш ва уларни бартараф этиш чоралари кўрилмоқда.
Шаҳарнинг Курчатова кўчасида Фавқулодда вазиятлар бошқармаси ходимлари томонидан қутқарув-ёрдам ишлари амалга оширилмоқда.
Рудакий кўчасидаги таъмирлаш ишлари олиб борилаётган кўчасида юк машинаси ботиб қолган. Ҳозирда ушбу юк машинасини чиқариш ишлари олиб борилмоқда.
Изоҳ (0)