Хитойнинг Ченгду шаҳрида Ўзбекистоннинг туризм салоҳиятини фаол тарғибот қилиш мақсадида бир гуруҳ ватандошлар томонидан истироҳат боғлари ва йирик савдо-кўнгилочар мажмуаларида «Ўзбекистонга саёҳат қил!» шиори остида тарғибот акцияси ўтказилди. Бу ҳақда Туризмни ривожлантириш қўмитаси маълум қилди.
Акция давомида маҳаллий аҳолига қўмита томонидан тақдим этилган Ўзбекистоннинг туризм салоҳиятини акс эттирувчи тарғибот материаллари тарқатилди ва уларга мамлакат ҳақида қизиқарли маълумотлар берилди.
«Акцияда маҳаллий аҳоли вакиллари, жумладан дўстларимиз, курсдошларимиз, профессор-ўқитувчиларимиз ва бошқа қизиқувчилар иштирок этиб, уларга Ўзбекистоннинг туризм салоҳияти, жумладан, ўзбек миллий таомлари, урф-одатлари ва халқимизнинг меҳмондўстлиги ҳақида батафсил маълумот бердик. Бундан ташқари, акция иштирокчиларига Ўзбекистоннинг туризм салоҳияти ҳақида тарғибот материаллари тарқатиб, видеороликлар намойиш этдик», — дейди талаба Нодир Уташев.
Шунингдек, Ченгду шаҳрида туризм соҳасида фаолият юритаётган хусусий туризм компаниялари ҳамда Сичуан университетида таҳсил олаётган Буюк Британия, Франция, Покистон ва Бангладеш каби мамлакатлар вакилларига Ўзбекистонда туризм соҳасида амалга оширилаётган ўзгаришлар, жумладан, виза тизимининг такомиллаштирилганлиги ҳақида маълумотлар берилди.
Изоҳ (0)