Шавкат Мирзиёев 2017 йил 28 март куни Навоий вилоятига ташрифи чоғида Навоий иссиқлик электр станциясида бўлиб, иккинчи буғ-газ қурилмаси пойдеворига тамал тоши қўйган эди. Бу ҳақда Президент матбуот хизмати маълум қилди.
Япониянинг Mitsubishi Corporation ва Mitsubishi Hitachi Power Systems консорциуми ҳамда «Ўзбекэнерго» акциядорлик жамияти ўртасида мазкур буғ-газ қурилмасини бунёд этиш бўйича шартнома имзоланган. Умумий қиймати 432 миллион АҚШ долларига тенг ушбу иншоотнинг қуввати 450 мегаватт. Қурилиш Mitsubishi Corporation and MHPS консорциуми ва Туркиянинг Calik Enerji компанияси томонидан амалга оширилмоқда.
Президент буғ-газ қурилмаси газ турбинасининг ишлаш жараёнини кўздан кечирди. Қурилма тўлиқ тайёр ҳолда жорий йил сентябрь ойида ишга туширилади.
Давлат раҳбари эътиборига лойиҳа амалга оширилиши туфайли эришиладиган натижалар ва буғ-газ турбинасининг техник-иқтисодий кўрсаткичлари ҳақидаги тақдимотлар ҳавола қилинди.
Буғ-газ қурилмаси ишга туширилиши натижасида йилига 3 миллиард 454 миллион киловатт-соат электр энергия ва иссиқлик энергияси ишлаб чиқарилади. Ҳисоб-китобларга кўра, лойиҳа самарасида 1 киловатт-соат электр энергияси ишлаб чиқариш учун шартли ёқилғи сарфи камайиши ҳисобидан йилига ўртача 829 миллион куб метр табиий газ тежалади.
Мамлакат энергетика тизимида 2025 йилгача яна бир қатор замонавий буғ-газ қурилмаларини барпо этиш режалаштирилмоқда. Бу, ўз навбатида, минг нафардан ортиқ хизмат кўрсатувчи юқори малакали мутахассис тайёрлаш заруратини келтириб чиқаради.
Президент ушбу эҳтиёжни таъминлаш мақсадида Навоий ИЭС базасида буғ-газ қурилмалари учун ходимлар тайёрлайдиган ўқув маркази ташкил этиш бўйича топшириқ берган эди. Корхонада Япония халқаро ҳамкорлик агентлиги — JICA молиявий кўмагида ўқув маркази ташкил этилди. Ҳозирги кунгача бу ерда 166 мутахассис тайёргарликдан ўтди.
Давлат раҳбари корхонанинг ишчилари ва хорижлик инвесторлар билан суҳбатлашди.
Изоҳ (0)