Тюмен давлат университети ташаббуси билан анъанавий тарзда ўтказиладиган рус тилини хорижий тил сифатида ўзлаштириш даражасини текширувчи халқаро олимпиадада Ўзбекистон шарафини ҳимоя қилган Алишер Навоий номидаги Тошкент давлат ўзбек тили ва адабиёти университети талабалари ғолиб бўлди. Бу ҳақда университет матбуот хизмати «Дарё»га маълум қилди.
Ушбу мусобақада Ўзбекистон, Қозоғистон, Нигерия, Вьетнам, Сурия, Колумбия, Тожикистон, Қирғизистон, Венесуэла, Жазоир, Сербия, Малайзия, Миср, Эквадор, Гана, Чад, Марокаш, Афғонистон, Мали, Туркманистон, Мўғулистон, Замбия ва бошқа кўплаб давлатлардан сараланган 104 нафар ёшлар танловнинг якунловчи босқичида иштирок этди. Улар орасида 20 нафар ўзбекистонлик талаба ҳам мусобақада қатнашди. Икки босқичли олимпиадада талабаларнинг рус тилида тинглаб тушуниш, сўзлаш ва мантиқий изчиликда бехато ёзиш кўникмалари синовдан ўтказилди.
Тенг курашлар остида ўтган беллашувда А ва Б гуруҳларида мутлақ ғолиблик Ўзбекистон вакиллари, яъни Алишер Навоий номидаги Тошкент давлат ўзбек тили ва адабиёти университети талабаларига насиб этди. Умумжамоа ҳисобида Ўзбекистондан кейинги ўринларни Сурия, Тожикистон, Афғонистон, Замбия, Ветнам ва Миср вакиллари қўлга киритишди. Танлов ғолибларини танатанали тақдирлаш маросими ҳам онлайн режимида ўтказилди. Барча совриндорлар номи маълум қилиниб, уларга ғолиблик сертификатлари ва эсдалик совғалари топширилди.
Маълумот учун, мазкур олимпиада ғолибларига Россия ОТМларида ижтимоий соҳа бўйича магистратурагакириш имконияти берилади, қолаверса, уларни Тюмен давлат университети ёзги мактабига таклиф қилади.
Изоҳ (0)