Чеченистон халқ артисти Сан Жай янги йил арафасида Zo‘r TV телеканали орқали «Карвон кўрдим» қўшиғи билан чиқиш қилиши, ушбу қўшиқ илк бора телеканалда премьера қилиниши ҳақида телеканалда маълум қилинган эди.
Аммо Сан Жай эфирдан сабабсиз олиб ташланди. Сан Жай нима сабабдан эфирдан олиб ташланганини билиш мақсадида журналист Феруз Муҳаммад Сан Жай билан суҳбатлашди.
Чеченистон халқ артисти Сан Жай ушбу масалага қуйидагича муносабат билдирди.
Ҳар доимгидек соқолим баҳона бўлди. Аммо ‘Ўзбекконцерт’ билан гаплашганимда ‘Сизда лицензиянгиз бор, бемалол телевидение ва радиоларда ҳамда бошқа тадбирларда чиқиш қилишингиз мумкин’ дейишганди. Яқинда ‘Ўзбекконцерт’ раҳбари билан гаплашганимда ҳам ‘сизни телеканалдан олиб ташлашга ҳеч кимнинг ҳаққи йўқ’, деган эдилар. Янги йилдан олдин Zo‘r TV телеканали ‘Фақат биз билан ишлайсиз’ деб бошқа каналларга боришга қўймаган. Ўша пайтлар мен ҳамма таклифларни Zo‘r TV сабаб рад этганман. Баъзи сабабларга кўра Zo‘r TV’да ҳам, бошқа жойларда ҳам чиқиш қилмадик. Ота-онам, барча қариндошларим эрталаб соат тўртгача мени чиқишимни кутиб ўтиришган. Энг қизиғи, телеканал раҳбарияти мени ‘тепадан қўнғироқ бўлди, мумкин эмас’ деб огоҳлантириб ҳам қўйишмади. Ҳаттоки, орадан 2-3 кун ўтиб, қўнғироқ қилиб, узр сўрашлари керак эди. Аммо улар буни ҳам қилишмади. Созандаларим билан бирга бир ҳафта Zo‘r TV’нинг янги йил лойиҳаси устида ишлаганмиз. Менимча, ‘тепадан’ ҳеч ким телефон қилмаган. Бу Zo‘r TV телеканали директоринининг иши. Чунки бир куни бизни қанақадир тадбирга чақиришди. Мен ‘банд эканлигимни, ҳақиқатдан бора олмаслигимни’, айтдим. Шундан кейин телеканал директори мендан хафа бўлган ва ‘отказ’ қилиб юборган. Бошқа ҳеч кимнинг аралашуви йўқ. ‘Ўзбекконцерт’ ‘сизда лицензия бор’ деяпти-ку. Zo‘r TV телеканалидан жуда хафаман. Чақиришса ҳам, пул беришса ҳам энди мен умуман Zo‘r TV’га бормайман. Сабабини билмасдан, ким биландир алоқа тўхтатиб қўйиш керак эмас.Сан Жай, Чеченистон халқ артисти