Маданият вазирлиги матбуот хизмати томонидан 26-27 февраль кунлари Хоразм вилоятига илк бор пресс тур ташкил этилди.
Пресс турда ОАВ ходимлари билан бир қаторда «Дарё» мухбири Феруз Муҳаммад ҳам Хива шаҳрида бўлиб, у ердаги меъморий ёдгорликларнинг ҳолатини ўрганди.
Хива Ичан қалъа музей қўриқхонасида 2019 йилдан аудио гид, яъни сайёҳлар учун тарихий обидаларни, шахсларни ўз тилида ҳикоя қилувчи, қулоқчин ёрдамида фойдаланишга мўлжалланган электрон мосламалар ишга тушди.
Бу ҳақда Хива Ичан қалъа музей қўриқхонаси директор ўринбосари Мақсудбек Абдурасулов Феруз Муҳаммадга берган қисқа интервьюсида маълум қилди.
Хива шаҳрида унинг тарихий қисми, Хива Ичан қалъа музей қўриқхонасида 2019 йил январь ойидан аудио гид тизими йўлга қўйилди. Бу ҳозирча Ичан қалъанинг фақат битта объекти, яъни хон саройига ўрнатилган. Яна иккита объектига ўрнатиш мақсадида, олтита тилга таржима қилиш жараёни кетмоқда. Биз Хивага келадиган чет эллик сайёҳларни мониторинг қилиб, улар орасида энг кўп келадиган давлатлар Франция, Германия, Италия, Испания ҳамда Япония давлатларининг фуқаролари эканлигини аниқладик. Шу сабабли аудио гидга жойлаштириладиган маълумотларни асосан ушбу давлатларнинг тилларига таржима қилмоқдамиз. Аудио гидлардан фойдаланиш маҳаллий сайёҳлар учун 5 минг сўм, чет эллик сайёҳлар учун эса 10 минг сўм қилиб белгиланган.Мақсудбек Абдурасулов, Хива Ичан қалъа музей қўриқхонаси директори ўринбосари
Изоҳ (0)