Дин вакилларига никоҳ ўқишдан аввал ФҲДЁ маълумотномасини талаб қилиш вазифаси қўйилди

1 март куни Тошкент шаҳридаги «Ёшлар маркази» биносида масжид имом-хатиблари ва ноиб-имомлари билан учрашув бўлиб ўтди. Унда масжидлар ҳолати, ободлиги ва дин соҳа вакилларининг вазифалари ҳақида сўз борди. Бу ҳақда Тошкент шаҳар ҳокимлиги матбуот хизмати хабар берди.

Бугунги кунда пойтахтда 119 та масжид фаолият юритмоқда.

Имомлар билан бўлиб ўтган суҳбатда масжидлардаги муаммолар ва эътибор қаратиш лозим масалаларга тўхтаб ўтилди. Хусусан, масжидларда белгиланган вақтларда намоз ўқилиши, ибодат қилувчиларга зарур шарт-шароитлар яратилиши, оилавий тадбирлар, тўй ва маъракаларда қилинадиган маърузалар тарбиявий аҳамиятга эга ва тадбирнинг мақсадига мос бўлишлиги, қурилиш ва реконструкция ишлари олиб борилаётган масжидларда архитектура талабларига риоя этилиши, эҳсон тушумлари ва ҳомий маблағлари тўғри кирим қилиниши ҳамда мақсадли сарфланиши ҳақида аниқ тавсия ва вазифалар берилди.

Шунингдек, жамиятда соғлом муҳитни шакллантиришда дин соҳа вакилларининг роли ва ўрни беқиёслиги эътироф этилган ҳолда, Президент ташаббуси билан БМТ томонидан қабул қилинган «Маърифат ва диний бағрикенглик» резолюцияси моҳияти тушунтирилди.

Очиқ мулоқот даврида адашган инсонларни тўғри йўлга бошлаш, маҳаллаларда аҳоли билан кўпроқ учрашувларни ташкил этиш, уларга «Маърифий ислом», «Жаҳолатга қарши маърифат» каби ғояларни тушунтириш, интернет тармоқларида тарқалаётган носоғлом диний тушунча ва ақидаларга қарши муносабат билдириш юзасидан тавсиялар берилди.

Жамиятда авж олаётган икки ва кўп хотинлик масаласи кўтарилди. Дин соҳа вакилларига никоҳланувчи шахслардан шаърий никоҳ ўқишдан аввал Фуқаролик ҳолати далолатномаларини ёзиш органлари томонидан берилган маълумотномани талаб қилиш вазифаси қўйилди.

Имом-хатиблар ва ноиб-имомлар ўз фаолиятларида юзага келаётган ҳолатлар бўйича фикр алмашди.

Учрашувда Ўзбекистон мусулмонлари идораси раиси ўринбосари Иброҳим Иномов ва Тошкент шаҳар ҳокими ўринбосари Шуҳрат Турдиқулов иштирок этди.