Айни пайтда Ўзбекистон Республикаси Соғлиқни сақлаш вазирлиги делегацияси Германия халқаро ҳамкорлик жамиятининг (GIZ) «Ўзбекистонда замонавий юқори технологияли тиббий асбоб-ускуналар билан ишлаш учун тиббий ва техник ходимларнинг малакасини ошириш» лойиҳасида иштирок этмоқда. Бу ҳақда Соғлиқни сақлаш вазирлигининг матбуот хизмати «Дарё»га маълум қилди.
Германия халқаро ҳамкорлик жамияти ва Ўзбекистон Республикаси Соғлиқни сақлаш вазирлигининг қўшма лойиҳаси замонавий тиббий технологиялардан фойдаланиш бўйича мамлакат тиббиёт ходимларининг салоҳиятини оширишга қаратилгани билан аҳамиятлидир. Ўтган даврда лойиҳа доирасида Ўзбекистон соғлиқни сақлаш тизимида ишлаётган 2500 дан ортиқ тиббиёт ва техник мутахассис тайёрланди.
19 февраль куни Гамбург шаҳрида лойиҳа ишчи гуруҳи йиғилиши бўлиб ўтди. Унда Ўзбекистон делегацияси томонидан «2019—2025 йилларда Ўзбекистон Республикаси соғлиқни сақлаш тизимини ривожлантириш концепцияси» мавзусида тақдимот ўтказилди. Сўзга чиққанлар Ўзбекистон Республикаси Президентининг «Ўзбекистон Республикаси соғлиқни сақлаш тизимини тубдан такомиллаштириш бўйича комплекс чора-тадбирлар тўғрисида»ги Фармони билан «2019—2025 йилларда Ўзбекистон Республикаси соғлиқни сақлаш тизимини ривожлантириш концепцияси» тасдиқлангани ҳамда шу асосда мамлакат соғлиқни сақлаш тизимини бошқариш ва молиялаштиришнинг бутунлай янги тизимига ўтказилаётгани таъкидланди.
Шунингдек, тақдимотда шошилинч тиббий ёрдам хизматини янада такомиллаштириш, Ўзбекистон соғлиқни сақлаш соҳасига юқори технологияларни сотиб олиш бўйича шартномаларни тайёрлаш юзасидан кўрилган чора-тадбирлар ҳақида сўз юритилди. Бундан ташқари, ўзбекистонлик мутахассислар Германия тиббиёт моделини ўрганиш орқали Ўзбекистонда соҳани юқори технологиялар асосида ривожлантиришда икки мамлакат мутахассислари ҳамкорлигини янада жадаллаштириш лозимлигини таъкидлади.
27 февралга қадар давом этадиган ташриф давомида делегация аъзолари Германия соғлиқни сақлаш тизимида молиялаштириш масалалари ва бошқариш усуллари, замонавий тиббий технологияларни бошқариш тамойиллари билан яқиндан танишади.
Изоҳ (0)