Ayni paytda O‘zbekiston Respublikasi Sog‘liqni saqlash vazirligi delegatsiyasi Germaniya xalqaro hamkorlik jamiyati (GIZ) tomonidan “O‘zbekistonda zamonaviy yuqori texnologiyali tibbiy asbob-uskunalar bilan ishlash uchun tibbiy va texnik xodimlarning malakasini oshirish” loyihasida ishtirok etmoqda. Bu haqda Sog‘liqni saqlash vazirligining matbuot xizmati “Daryo”ga ma’lum qildi.
Germaniya xalqaro hamkorlik jamiyati va O‘zbekiston Respublikasi Sog‘liqni saqlash vazirligining qo‘shma loyihasi zamonaviy tibbiy texnologiyalardan foydalanish bo‘yicha mamlakat tibbiyot xodimlarining salohiyatini oshirishga qaratilgani bilan ahamiyatlidir. O‘tgan davrda loyiha doirasida O‘zbekiston sog‘liqni saqlash tizimida ishlayotgan 2500 dan ortiq tibbiyot va texnik mutaxassis tayyorlandi.
19-fevral kuni Gamburg shahrida loyiha ishchi guruhi yig‘ilishi bo‘lib o‘tdi. Unda O‘zbekiston delegatsiyasi tomonidan “2019—2025-yillarda O‘zbekiston Respublikasi sog‘liqni saqlash tizimini rivojlantirish konsepsiyasi” mavzusida taqdimot o‘tkazildi. So‘zga chiqqanlar O‘zbekiston Respublikasi Prezidentining “O‘zbekiston Respublikasi sog‘liqni saqlash tizimini tubdan takomillashtirish bo‘yicha kompleks chora-tadbirlar to‘g‘risida”gi Farmoni bilan “2019—2025-yillarda O‘zbekiston Respublikasi sog‘liqni saqlash tizimini rivojlantirish konsepsiyasi” tasdiqlangani hamda shu asosda mamlakat sog‘liqni saqlash tizimini boshqarish va moliyalashtirishning butunlay yangi tizimiga o‘tkazilayotgani ta’kidlandi.
Shuningdek, taqdimotda shoshilinch tibbiy yordam xizmatini yanada takomillashtirish, O‘zbekiston sog‘liqni saqlash sohasiga yuqori texnologiyalarni sotib olish bo‘yicha shartnomalarni tayyorlash yuzasidan ko‘rilgan chora-tadbirlar haqida so‘z yuritildi. Bundan tashqari, o‘zbekistonlik mutaxassislar Germaniya tibbiyot modelini o‘rganish orqali O‘zbekistonda sohani yuqori texnologiyalar asosida rivojlantirishda ikki mamlakat mutaxassislari hamkorligini yanada jadallashtirish lozimligini ta’kidladi.
27-fevralga qadar davom etadigan tashrif davomida delegatsiya a’zolari Germaniya sog‘liqni saqlash tizimida moliyalashtirish masalalari va boshqarish usullari, zamonaviy tibbiy texnologiyalarni boshqarish tamoyillari bilan yaqindan tanishadi.
Izoh (0)